بنگلادیش کی عدالت نے 1971 کے دوران فسادات کے الزام میں جماعت اسلامی بنگلادیش کے رہنما مطیع الرحمان نظامی کو سزائے موت کا حکم جاری کردیا۔
غیر ملکی خبر رساں ادارے کے مطابق جنگی جرائم سے متعلق خصوصی عدالت نے جماعت اسلامی بنگلادیش کے 71 سالہ رہنما مطیع الرحمان نظامی کو قتل،عصمت دری اور لوٹ مارکے الزامات پرسزائے موت کا حکم جاری کردیا جبکہ اس سے قبل خصوصی عدالت کے حکم پرجماعت اسلامی کے رہنما ملا عبدالقادرکو بھی پھانسی دے دی گئی تھی۔
واضح رہے کہ بنگلہ دیش میں عوامی لیگ کی حکومت نے 1971 میں پاک فوج کے ساتھ تعاون اور بنگالی عوام کے خلاف جرائم کے ذمہ داروں کے تعین اور انہیں سزا دینے کے لئے خصوصی ٹریبونل قائم کیا تھا جو جماعت اسلامی بنگلادیش کے رہنما علی احسن محمد مجاہد کو سزائے موت اور غلام اعظم کو90 سال قید کی سزا سنا چکا ہے۔