سمندری طوفان ’’نیلوفر‘‘ اور پاکستان کے درمیان فاصلہ کم رہ گیا

سمندری طوفان نیلو فر نے شمال مشرق کا رخ اختیار کرلیا ہے، چیف میٹرولوجسٹ

ویب ڈیسک October 29, 2014

طوفان کے ساتھ 105 ناٹ فی گھنٹہ کی رفتار سے ہوائیں اور طویل بادلوں کا بھی سلسلہ ہے، فوٹو؛فائل

بحیرہ عرب میں بننے والے شدید سمندری طوفان نیلوفر نے شمال مشرق کا رخ اختیار کرلیا جس سے طوفان اور پاکستان کے درمیان فاصلہ کم رہ گیا ہے۔

ایکسپریس نیوز کے مطابق چیف میٹرولوجسٹ توصیف عالم نے بتایا کہ سمندری طوفان نیلو فر نے شمال مشرق کا رخ اختیار کرلیا ہے جس سے طوفان اور پاکستان کے درمیان فاصلہ کم رہ گیا ہے جبکہ طوفان کے پاکستان یا بھارت کی جانب رخ کا اندازہ آئندہ 10 گھنٹے میں واضح طور پر لگایا جاسکے گا۔ محکمہ موسمیات کا کہنا ہےکہ شمال مشرق میں بھارتی گجرات، ٹھٹھہ، کیٹی بندر اور بلوچستان سمیت سندھ کے دیگر ساحلی علاقے شامل ہیں۔

نیلوفر طوفان کے زیریں سندھ سے جانے کا امکان ظاہر کیا جارہا ہے جبکہ طوفان کے ساتھ 105 ناٹیکل میل فی گھنٹہ کی رفتار سے ہوائیں اور طویل بادلوں کا بھی سلسلہ ہے جس سے کراچی سمیت دیگر ساحلی علاقوں میں موسلادھار بارش کا بھی امکان ہے۔

دوسری جانب فشر فوک کے مطابق سمندری طوفان کے پیش نظر 70 فیصد ماہی گیر سمندر سے واپس آگئے لیکن ایک ہزار سے زائد ماہی گیر اب بھی سمندر میں موجود ہیں۔