ماروی میمن نے گرفتار آئی ڈی پیز کی رہائی کے بعد بنوں جیل کے باہر دیا گیا دھرنا ختم کردیا

ماروی میمن نے پولیس کی جانب سے گرفتار آئی ڈی پیز کی رہائی کے لئے بنوں جیل کے باہر کئی گھنٹوں تک دھرنا دیا

ویب ڈیسک November 15, 2014

2 روز قبل بنوں پولیس نے راشن کی تقسیم کے دوران بد انتظامی کے بعد درجنوں آئی ڈی پیز کو گرفتار کر لیا تھا۔ فوٹو؛ ایکسپریس نیوز

LAHORE/FAISALABAD: پاکستان مسلم لیگ (ن) کی رہنما ماروی میمن نے خیبر پختونخوا پولیس کی جانب سے گرفتار کئے گئے شمالی وزیرستان کے آئی ڈی پیز کی رہائی کے بعد بنوں جیل کے باہر دیا گیا دھرنا ختم کردیا ہے۔

ایکسپریس نیوز کے مطابق ماروی میمن نے پولیس کی جانب سے گرفتار آئی ڈی پیز کی رہائی کے لئے بنوں جیل کے باہر کئی گھنٹوں تک دھرنا دیا، ان کا کہنا تھا کہ پولیس نے آئی ڈی پیز کو بلا جواز تشدد کا نشانہ بنایا اور انہیں گرفتار کیا لہٰذا ان کی رہائی تک دھرنا جاری رہے گا۔ بعد ازاں پولیس نے گرفتار آئی ڈی پیز کو رہا کردیا جس کے بعد ماروی میمن نے دھرنا ختم کردیا۔

واضح رہے کے 2 روز قبل بنوں کے اسپورٹس کمپلکس میں راشن کی تقسیم کے دوران بد نظمی کے بعد پولیس اور آئی ڈی پیز کے درمیان ہونے والے تصادم کے نتیجے میں متعدد مظاہرین زخمی ہو گئے تھے جب کہ درجنوں آئی ڈی پیز کو پولیس نے گرفتار کر لیا تھا۔