ورلڈ کپ حریفوں سے قبل گرین شرٹس انجریز کے ساتھ نبرد آزما

کھلاڑی گھٹنے،پنڈلی اور ٹخنے پکڑ کر بیٹھنے لگے، سہیل خان کی فٹنس بھی مشکوک،6 اوورزکرکے میدان سے باہر آنا پڑا فوٹو: اے ایف پی/فائل

---

ورلڈکپ میں حریفوں سے قبل گرین شرٹس انجریز کے ساتھ نبردآزما ہیں اور کھلاڑی گھٹنے، پنڈلی اور ٹخنے پکڑ کر بیٹھنے لگے،

تفصیلات کے مطابق ورلڈکپ سے قبل پاکستان کی مشکلات کم ہونے کا نام نہیں لے رہیں، جنید خان اور محمد حفیظ کے بعد فاسٹ بولر سہیل خان بھی انجری کا شکار ہوگئے ہیں، سڈنی کے بلیک ٹاؤن اولمپک پارک میں بنگلہ دیش کے خلاف وارم اپ میچ میں ابھی15 اوورز کا کھیل ہی ہوا تھا کہ بولنگ کے دوران پیسر کی پنڈلی میں تکلیف ہوگئی، جس کے بعد وہ گراؤنڈ سے باہر آگئے، ڈریسنگ روم میں قومی ٹیم کے فزیو تھراپسٹ نے فوری طور ان کا علاج شروع کردیا،انجری کا شکار ہونے سے قبل سہیل خان نے6 اوورز میں 18 رنز کے عوض ایک وکٹ حاصل کی تھی۔

ٹیم کے ہمراہ موجود میڈیا منیجر آغا اکبر نے میڈیا کو بتایا کہ فاسٹ بولر کی پنڈلی پر سوجن ہے جسے دورکرنے کیلیے اقدامات کیے جارہے ہیں، بطور احتیاط انھیں6اوورز بعد بولنگ کیلیے نہیں بھیجا گیا، پیسر کو اب بھی دوڑنے میں کوئی دشواری نہیں اور امید ہے کہ وہ جلد ہی اس تکلیف سے نجات حاصل کرلیں گے۔ یاد رہے کہ پاکستانی ٹیم ورلڈکپ کیلیے روانگی سے قبل ہی فٹنس مسائل سے دوچار ہوگئی تھی،عمرگل کوگھٹنے کی تکلیف کے سبب حتمی اسکواڈ کیلیے زیر غور نہیں لایا گیا، جنید خان تربیتی کیمپ کے دوران ہیمسٹرنگ انجری کا شکار ہوکر باہر ہوگئے۔

ان کا خلا بلاول بھٹی سے پُر کرنے میں ناکامی کے بعد راحت علی کو متبادل کے طور پر بھیجنے کا فیصلہ کیا گیا، کیویز سے سیریز کے دوسرے ون ڈے میں پنڈلی زخمی ہونے پر محمد حفیظ کا ورلڈکپ میں سفر شروع ہونے سے قبل ہی تمام ہوگیا،ڈاکٹرز نے انھیں ایک ماہ تک آرام کا مشورہ دیا ہے،بطور متبادل ناصر جمشید کو اسکواڈ میں شامل کیا گیا،اب سہیل خان کی فٹنس بھی خدشات کا شکار ہوگئی ہے۔