جنوبی کوریا سے آزاد تجارتی معاہدے پر مذاکرات آج شروع ہونگے

پاک چائنا اکنامک کوریڈورمیں دیگرممالک کے لیے بھی بڑے مواقع ہیں،کورین انویسٹرفائدہ اٹھا سکتے ہیں،خرم دستگیر۔فوٹو : اے پی پی

---

وفاقی وزیر تجارت انجینئر خرم دستگیر خان نے کہا ہے کہ پاکستان جنوبی کوریا سے تجارت کے فروغ کے لیے آزاد تجارتی معاہدہ کرے گا جس کے لیے باقاعدہ مذاکرات کا آغاز بدھ کو کوریا کے وزیر تجارت سے ملاقات کے دوران کیا جائے گا، پاکستان میں جنوبی کوریا کے کاروباری افرادکے لیے سرمایہ کاری کے بے پناہ مواقع موجود ہیں، پاکستان جنوبی کوریا کی جدید ٹیکنالوجی سے بھی فائدہ اٹھانا چاہتا ہے۔

ان خیالات کا اظہاروفاقی وزیر نے جنوبی کوریا میں حکومتی نمائندوں اور تاجر برادری کے نمائندوں سے ملاقات کے دوران کیا۔ وفاقی وزیر نے جنوبی کوریا چیمبر آف کامرس اینڈ انڈسٹری،کوریا امپورٹرز ایسوسی ایشن، ہونڈائی موٹر گروپ، لاٹے گروپ،کوریا ٹریڈ انشورنس کارپوریشن اور کورین ایئر کے سربراہان سے ملاقات کی۔ کوریا کی وزارت تجارت، صنعت اور توانائی کے نائب وزیر نے بھی وفاقی وزیر سے ملاقات کی۔

اس موقع پر وفاقی وزیر نے کہا کہ موجودہ حکومت نے ملک کے 2 بڑے مسائل دہشت گردی اور توانائی کے بحران پر قابو پالیا ہے جس کے مثبت نتائج سامنے آرہے ہیں، حکومت کی کامیاب معاشی منصوبہ بندی کی بدولت عالمی معاشی اداروں نے پاکستان کی رینکنگ مثبت کر دی ہے اور سرمایہ کار پاکستان میں سرمایہ کاری میں دلچسپی لے رہے ہیں۔

انھوں نے کہا کہ پاک چائنا اکنامک کوریڈور کے آغاز سے دوسرے ممالک کے لیے سرمایہ کاری کے دروازے کھل جائیں گے، کورین سرمایہ کار پاکستان میں اپنی سرمایہ کاری بڑھا کر ان مواقع سے فائدہ اٹھا سکتے ہیں۔ انھوں نے پاک کوریا تجارت میں اضافے کے لیے ہرممکن تعاون فراہم کرنے کا یقین دلایا۔