یورپی یونین کا پاکستانی محققین کیلیے40 کروڑ یورو کی گرانٹ کا اعلان

جامعہ کراچی تحقیق کے شعبے میں قابل تحسین کام کررہی ہے،اسٹیفنوگیٹو،تحقیق سے انسانیت کا روشن مستقبل وابستہ ہے ،ڈاکٹر قیصر فوٹو فائل

---

یورپی یونین نے دنیا کے سب سے بڑے سائنسی ریسرچ فنڈنگ پروگرام ہاریزن 2020 کے تحت پاکستانی محققین کے لیے 40 کروڑ یورو (400 ملین) کی گرانٹ کا اعلان کیا ہے۔

اس سلسلے میں پروگرام کا باقاعدہ آغاز جامعہ کراچی سے کردیا گیا ہے پروگرام کا اعلان پاکستان میں موجود یورپی یونین کے وفدکے ڈپٹی ہیڈ اسٹیفنوگیٹو نے جامعہ کراچی میں سیمینار سے خطاب میں کیا انھوں نے کہا کہ یورپی یونین ایک مضبوط اور پائیدار سیاسی ادارہ ہے ہاریزن2020 کے زیراہتمام پاکستان کے محققین اور طلبا کو40 کروڑ یوروکی خطیر رقم گرانٹ کی صورت میں دی جائے گی، جامعہ کراچی تحقیق کے شعبے میں قابل تحسین کام کررہی ہے۔

پاکستانی محققین دنیا بھر میں تحقیقاتی شعبے میں جامعہ کراچی اور پاکستان کا نام روشن کررہے ہیں، پروگرام کا اہتمام پاکستان سائنس فاؤنڈیشن، یورپی یونین اور جامعہ کراچی کے اشتراک سے کیا گیا تھا اس موقع پرشیخ الجامعہ ڈاکٹر محمد قیصر، پاکستان سائنس فاؤنڈیشن کے چیئرمین پروفیسر ڈاکٹر محمد اشرف اور اساتذہ موجود تھے۔

اسٹیفنو گیٹو نے کہا کہ اس طرح کے پروگرام ملک کے دوسرے شہروں میں بھی شروع کیے جائیں گے اور یہ کراچی میں اس طرز کا پہلا پروگرام ہے جس کی میزبانی کے لیے جامعہ کراچی کا شکرگزارہوں، ڈاکٹر محمد قیصر نے اسٹیفنو گیٹو اور چیئر پاکستان سائنس فاؤنڈیشن کے چیئر مین پروفیسر ڈاکٹر محمد اشرف کی کاوش کو خوش آئند قرار دیا انھوں نے کہا کہ اس سے محققین کو نئی سمت اور نئی رہنمائی میسر آتی ہے تحقیق سے انسانیت کا روشن مستقبل وابستہ ہے اور اسی میں تمام مسائل کا حل پوشیدہ ہے یورپی یونین کا پاکستانی محققین کو خطیر گرانٹ فراہم کرنے کا اعلان خوش آئند ہے۔

پاکستان سائنس فاؤنڈیشن کے چیئر مین پروفیسر ڈاکٹر محمد اشرف نے کہا کہ پاکستان سائنس فاؤنڈیشن سائنس اور ٹیکنالوجی کے شعبے میں پاکستانی تحقیقی شعبوں کو خطیر گرانٹس فراہم کرتی ہے، فاؤنڈیشن کا مقصد سائنسی کلچر کو عام کرنا ہے، یورپی یونین سے ملنے والی گرانٹ کے حصول کے لیے اعلیٰ معیار کی تحقیق کا ہونا ضروری ہے، بھارت میں یورپی یونین کے سائنسی امور کے کونسلر ڈینس ڈبمویز نے ویڈیو لنک کے ذریعے خطاب میں کہا کہ ترقی پذیر اقوام میں جدید تحقیق ضروری ہے یورپ سائنس اور ٹیکنالوجی کے شعبے میں بے پناہ ترقی کے منازل تیزی سے طے کررہا ہے۔

یورپ میں دنیا کے زیادہ محققین موجود ہیں دنیا بھر میں سائنس اور ٹیکنالوجی کی ایک تہائی پیداوار یورپ سے ہوتی ہے، ہاریزن2020 دنیا کا سب سے بڑا ریسرچ فنڈنگ پروگرام ہے جوکہ محققین کو ان کی تحقیق کے لیے خطیر گرانٹ فراہم کرے گا، یورپی یونین پاکستان میں تحقیقی شعبے میں کافی کام کررہاہے گزشتہ برسوں میں402 پاکستانی طالبعلم10اسکالرز یورپی یونین کے اسکالرشپ فنڈنگ حاصل کرچکے ہیں جوکہ لائق تحسین ہے۔