بھارتی کرکٹ بورڈ کے رویے سے سخت مایوسی ہوئی چیرمین پی سی بی

ہم صرف کرکٹ کی بحالی کے لئے کوششوں میں مصروف ہیں۔ شہریارخان فوٹو: فائل

---

چیرمین پی سی بی شہریار خان کا کہنا ہے کہ بھارتی کرکٹ بورڈ کے رویے سے بہت مایوسی جب کہ دونوں ممالک کے درمیان کرکٹ سیریز کا کوئی امکان نہیں تاہم پاکستان بھارت میں ہونے والے ٹی ٹوئنٹی ورلڈکپ کا بائیکاٹ نہیں کرے گا۔

نئی دلی میں میڈیا سے بات کرتے ہوئے پاکستان کرکٹ بورڈ کے چیرمین شہریار خان کا کہنا تھا کہ بھارتی کرکٹ بورڈ کے رویئے سے انتہائی مایوسی ہوئی ہے جب کہ ہم صرف کرکٹ کی بحالی کے لئے کوششوں میں مصروف ہیں۔ انہوں نے کہا کہ دونوں بورڈز کو کوشش کرنا ہوگی کیوں کہ تالی دوہاتھوں سے بجتی ہے جب تک بھارتی بورڈ کوئی جواب نہیں دیتا میں کچھ کہنے سے قاصر ہوں کہ سیریز ہوگی کہ نہیں تاہم میں پاک بھارت کرکٹ سیریز کے حوالے سے پرامید نہیں ہوں۔

شہریار خان کا کہنا تھا کہ بھارتی بورڈ کوملاقات کےلیے خود کوشش کرنی چاہیے تھی،مگر کل کے واقعے کے بعد میں پرامید نہیں ہوں اور اب یہاں مزید ملاقاتوں کا امکان نہیں لہذا میں آج پاکستان واپس جارہا ہوں۔ ایک سوال کے جواب میں انہوں نے کہا کہ بھارت میں ہونے والے ٹی ٹوئنٹی ورلڈکپ کے بائیکاٹ کا سوال ہی پیدا نہیں ہوتا، پاکستان ٹی ٹوئنٹی ورلڈ کپ ضرورکھیلے گا۔