کاروباری برادری ٹیکس ادا کرےصدرمملکت

حکومت کاروباری اور تاجر برادری کو سازگار کاروباری ماحول فراہم کرنے کے لیے تمام وسائل بروئے کار لا رہی ہے،ممنون حسین فوٹو: فائل

---

صدر مملکت ممنون حسین نے کہا ہے کہ پاک چین اقتصادی راہداری اور توانائی کے منصوبوں کی تکمیل سے کاروبار کی نئی راہیں کھلیں گی اور روزگار کے مواقع ملیں گے، اس سلسلے میں حکومت کی پالیسیاں درست سمت میں ہیں۔

انہوں نے یہ بات بدھ کو عاطف اکرام شیخ کی سربراہی میں اسلام چیمبر آف کامرس اینڈ انڈسٹری کے وفد سے ایوان صدر میں بات چیت کرتے ہوئے کہی۔ صدر مملکت نے حکومتی پالیسیوں پر اعتماد کا اظہار کرتے ہوئے کہا کہ ملک صحیح سمت میں آگے بڑھ رہا ہے، بہتر اقتصادی پالیسیوں کی وجہ سے بین الاقوامی مالیاتی اداروں نے پاکستان کو ابھرتی ہوئی مارکیٹ کی درجہ بندی میں شامل کیا ہے، حکومت کاروباری اور تاجر برادری کو سازگار کاروباری ماحول فراہم کرنے کے لیے تمام وسائل بروئے کار لا رہی ہے۔

صدر مملکت نے چیمبر کے وفد کو مشورہ دیا ہے کہ وہ ملک میں عمدہ کارکردگی کا مظاہرہ کرنے والے تاجروں کو ایوارڈ سے نوازیں تاکہ ان میں زیادہ سے زیادہ مقابلے کا رجحان پیدا ہو، کاروباری طبقے کے مسائل حل کرنے کے لیے حکومت بھرپور اقدامات کر رہی ہے، کاروباری اور تاجر برادری کو اپنے مجوزہ ٹیکس دینے چاہئیں تاکہ اس سے حاصل ہونے والی آمدنی سے عام لوگوں کو زیادہ سے زیادہ سہولتیں فراہم کی جا سکیں۔ اسلام آباد چیمبر کے صدر نے صدر مملکت کو اپنے مسائل سے آگاہ کیا۔