فوج کے ریٹائرڈ سپاہیوں کو پولیس میں تعینات کرنے کا فیصلہ

ٹریفک قوانین کی زیادہ خلاف ورزی ڈیفنس میں ہوتی ہے، خرم گلزار، پولیس نفری میں اضافہ وقت کی اہم ضرورت ہے، ہارون شمسی. فوٹو: فائل

---

محکمہ پولیس نے امن وامان کی صورتحال بہتر بنانے کے لیے نفری کی کمی پاک فوج کے ریٹائرڈ سپاہیوں سے دور کرنے کا فیصلہ کیا ہے۔

ایڈیشنل آئی جی سندھ اقبال محمود نے منگل کوفیڈرل بی ایریا ایسوسی ایشن آف ٹریڈ اینڈ انڈسٹری کے ظہرانے سے خطاب کرتے ہوئے بتایا کہ کہا ہے کہ نفری کی قلت دور کرنے کے لیے پاک فوج کے ریٹائرڈ سپاہیوں کی کنٹریکٹ کی بنیاد پر تقرریاں کی جائیں گی، انھوں نے کہا کہ غیرقانونی اسلحہ رکھنے پر سزا کے قانون میں ترمیم کی تجویز دی گئی ہے۔

جس کے تحت غیرقانونی اسلحہ رکھنے کے جرم میں گرفتاری ناقابل ضمانت اور کم از کم10سال قیدکی سزا تجویز کی گئی ہے، محکمہ کی جانب سے103CRPC میں بھی ترمیم تجویز کی گئی ہے ان ترامیم کا مقصد جرائم پیشہ عناصر کے خلاف قانون کی گرفت کو مضبوط بنانا ہے۔



انھوں نے بتایا کہ اولڈ سٹی ایریا میں پولیس کی بھاری نفری کی تعینانی اور مستقل بنیادوں پرمانیٹرنگ سسٹم کی بدولت گزشتہ ڈیڑھ ماہ کے دوران اولڈ سٹی ایریا میں بھتہ خوری، قتل وغارت گری و دیگر جرائم پر قابو پالیا گیا ہے، کراچی کی تجارتی وصنعتی تنظیمیں اگر پولیس کے سپاہیوں کی اونرشپ لیتے ہوئے ان کی کارکردگی وطرز عمل کی نگرانی کریں تو حالات تیزی رفتاری کے ساتھ بہتر ہوسکتے ہیں۔

اقبال محمود نے بتایا کہ محکمہ پولیس میں نفری شہر کی آبادی کے مقابلے میں انتہائی کم ہے جس کا اندازہ اس امر سے لگایا جاسکتا ہے کہ 1000 شہریوں کے لیے صرف ایک پولیس سپاہی تعینات ہے، اس موقع پر انھوں نے ایف بی ایریا کرائم مانیٹرنگ سیل کے لیے مستقل بنیادوں پر پولیس نفری، موبائل وین اور موٹرسائیکلیں فراہم کرنے کا بھی اعلان کیا، تقریب کے دوران معروف صنعتکار جاوید غوری کے استفسار پرڈی آئی جی ٹریفک خرم گلزار نے کہا کہ شہر میں ٹریفک قوانین پر عمل درآمد کو یقینی بنانے کے لیے چالان کی شرح میں نمایاں اضافہ وقت کی اہم ضرورت ہے، اس ضمن میں حکومت کو ایک بارپھر تجاویز ارسال کی گئی ہیں۔



انھوں نے انکشاف کیا کہ ٹریفک قوانین کی سب سے زیادہ خلاف ورزی ڈیفنس میں ہوتی ہے، ایف ایریا ایسوسی ایشن کے چیئرمین ہارون شمسی نے استقبالی کلمات ادا کرتے ہوئے کہا کہ ایف بی ایریا صنعتی علاقے میں شہر کے دیگر صنعتی علاقوں کی نسبت جرائم کی شرح کم ہے لیکن علاقے کو مستقل بنیادوں پر پرامن رکھنے کیلیے پولیس نفری میں اضافہ وقت کی اہم ضرورت ہے،ایسوسی ایشن کی لا اینڈ آرڈرکمیٹی کے چیئرمین ادریس گیگی نے بتایا کہ ایف بی ایریا پولیس اسٹیشن کراچی کے4 حساس تھانوں میں شامل ہے۔

لہٰذا محکمہ پولیس کو اس علاقے کی حساسیت کو مدنظر رکھتے ہوئے نفری میں اضافے کے ساتھ موثر پٹرولنگ وحکمت اختیار کرنے کی ضرورت ہے،تقریب سے محمد عرفان اصلی پری، فاروق بکالے اور مسرورعلوی نے بھی خطاب کیا۔