کالا باغ ڈیم پر اتفاق رائے کیلئے کمیٹی بنائی جائے پنجاب حکومت

انتخابی نتائج دیکھ کر شجاعت چاہتے ہیںعام الیکشن ہمیشہ کیلیے ملتوی ہوجائیں لیکن ن لیگ تاخیر برداشت نہیں کریگی، ثنااللہ۔ فوٹو: فائل

---

وزیرقانون پنجاب رانا ثنااللہ نے کہاہے کہ کالا باغ ڈیم پاکستان کی ضرورت ہے لیکن دوسرے صوبوں سے محاذ آرائی نہیں چاہتے۔

ہمارا مطالبہ ہے اس کیلیے قومی اور بین الاقوامی ماہرین پر مشتمل کمیٹی تشکیل دی جائے جو اس منصوبے کی مخالفت کرنے والوں سے ٹیکنیکل معاملات پر بات کرکے اتفاق رائے پیدا کرے ، ضمنی انتخابات کے نتائج دیکھنے کے بعد چوہدری شجاعت چاہتے ہیں کہ عام الیکشن ہمیشہ کیلیے ملتوی ہوجائیں لیکن ن لیگ ایک دن کیلیے بھی الیکشن ملتوی نہیں ہونے دے گی۔

گزشتہ روز پریس کانفرنس میں انھوں نے کہاکہ پنجاب اسمبلی کالا باغ ڈیم کے حق میں کئی قراردادیں منظور کرچکی ہے، ملک میں توانائی کی کمی ہے، اس لیے کالا باغ ڈیم ملکی مفاد میں ہے لیکن ہم کسی دوسرے صوبے پر محاذ آرائی نہیں چاہتے، ہمیں پاکستان زیادہ عزیز ہے، وفاقی حکومت کی ذمے داری تھی کہ وہ کالا باغ ڈیم پر اتفاق رائے پیدا کرتی لیکن اسے تو لوٹ مار سے فرصت نہیں ہے، رانا ثنااللہ نے کہاکہ ضمنی الیکشن میں دھاندلی کے حوالے سے کسی ایک بھی حلقے سے تحریری شکایت نہیں کی گئی، اصل میں پیپلزپارٹی اور مسلم لیگ ق کی کرتوتوں کی وجہ سے عوام نے اپوزیشن کے ساتھ دھاندلی کی ہے۔



ایک سوال پر انھوں نے کہاکہ جسٹس (ر)خلیل رمدے اور خواجہ شریف کے وکیل بیٹوں کوکیس لڑنے پر کروڑوں روپے فیس دینے کی بات غلط ہے، انھوں نے کہاکہ پنجاب میں جعلی پولیس مقابلوں کاتاثرغلط ہے، ایک سال کے دوران 364 پولیس مقابلے ہوئے جن میں25پولیس اہلکار شہید ہوئے ، وزیر قانون نے کہا کہ گورنر لطیف کھوسہ کا ذہنی توازن خراب ہوچکا ہے، انھیں ہٹانے کے معاملے پر عوامی نیشنل پارٹی کے مطالبے کی تائید کرتے ہیں۔ کالا باغ ڈیم پاکستان سے اہم نہیں ہے تاہم اس کی تعمیر کے حوالے سے سندھ اور خیبرپختونخوا کے انجنیئروں کے خدشات درست نہیں ہیں۔