جنید جمشید کا چترال جانے سے قبل اپنے کوآرڈینیٹر کیلیے آخری آڈیو پیغام

یاد رکھنا میں اپنی ذات کے لیے کبھی کسی سے ناراض نہیں ہوتا، جنید جمشید کا اپنے کوآرڈینیٹر کو آڈیو پیغام، فوٹو؛ فائل

---

KARACHI: معروف نعت خواں جنید جمشید نے چترال جاتے ہوئے اپنے کوآرڈینیٹر کو واٹس ایپ کے ذریعے ایک آڈیو پیغام بھیجا جس میں انہوں نے اپنی واپسی کے پروگرام کے حوالے سے بتایا۔

اس خبر کو بھی پڑھیں: جنید جمشید کی زندگی پر ایک نظر

ایکسپریس نیوز کو طیارے حادثے میں جاں بحق ہونے والے معروف نعت خواں جیند جمشید کا واٹس ایپ پر کیے جانے والا آخری آڈیو پیغام موصول ہوا ہے جس میں انہوں نے چترال جانے سے قبل اپنے کوآرڈینیٹر کے لیے آڈیو پیغام ریکارڈ کرتے ہوئے اسے اپنے ناراض نہ ہونے کا یقین دلایا اور آڈیو پیغام میں چترال سے 5 سے 6 روزمیں واپس آنے کا بھی بتایا۔

آڈیو پیغام میں جنید جمشید کا کہنا تھا کہ بھائی کوئی ٹینشن نہیں، اللہ نہ کرے کہ تم سے ناراضگی ہو، ایسا کبھی نہیں ہوسکتا کیوں کہ تم میرے چھوٹے بھائی ہو اور میرے دل میں رہتے ہو، دراصل میں آج کل مصروف ہونے کے سبب واٹس ایپ نہیں دیکھ پارہا بس اس لیے تمہارا میسج نہیں دیکھ سکا اور اس لیے جواب بھی نہیں دے سکا۔ اپنے پیغام میں انہوں نے مزید کہا کہ تم میرے دل کے ٹکڑے ہو، کبھی ایسا سوچنا بھی مت کہ میں تم سے ناراض ہوں گا اور یہ یاد رکھنا میں اپنی ذات کے لیے کبھی کسی سے ناراض نہیں ہوتا۔

اس خبر کو بھی پڑھیں: جنید جمشید کا ٹوئٹر اور فیس بک پر آخری اسٹیٹس

جنید جمشید نے اپنے کوآرڈینیٹر سے کہا کہ میں کل چترال چلا جاؤں گا، اگر تم آنا چاہو تو چترال آجانا اور مجھ سے پوچھ لینا جب کہ نہیں بھی آسکے تو کوئی مسئلہ نہیں، 5 سے 6 دن میں میری واپسی ہوجائے گی، مگر تم اپنا خیال رکھنا۔