وزیراعظم کی تلاشی لی جارہی ہے تو وہ قانون کے پیچھے چھپ رہے ہیں عمران خان

وزیراعظم قانون کے پیچھے نہیں چھپ سکتے ہیں، عمران خان: فوٹو: فائل

---

پاکستان تحریک انصاف کے چئیرمین عمران خان کا کہنا تھا کہ پاناما کیس میں وزیر اعظم کی تلاشی لی جارہی ہے تو وہ قانون کے پیچھے چھپ رہے ہیں۔

سپریم کورٹ کے باہرمیڈیا سے بات کرتے ہوئے پاکستان تحریک انصاف کے چئیرمین عمران خان کا کہنا تھا کہ پاناما لیکس انکشافات سے دنیا میں تہلکہ مچا، پاناما لیکس میں آنے والے ناموں سے کسی نے انکارنہیں کیا، کارروائی کے دوران وکیل نے 3 بار کہا کہ عدالت کے پاس اختیارنہیں ہے، پہلی بار انہوں نے مانا کہ لندن کے فلیٹس ہمارے ہیں جب کہ پہلے انہوں نے صاف انکارکیا تھا کہ فلیٹ ہمارے نہیں ہیں تو لندن کے سب سے مہنگے علاقے میں کیا حاتم طائی نے انہیں رہنے دیا تھا، 15 ملین درہم کا حساب ہم کہاں سے لائیں گے اور ملکیت تسلیم کرلی تو اب انہوں نے ہی جواب دینا ہے۔

عمران خان کا کہنا تھا کہ نوازشریف نے اسمبلی میں کہا کہ ان کے پاس تمام دستاویزات موجود ہیں خود کو احتساب کے لئے پیش کرتے ہیں لیکن اب ان سے یہ پوچھا جارہا ہے کہ انہوں نے اسمبلی کی صحیح بات کی تھی یاعدالت میں، گلف اسٹیل 15 ملین درہم نقصان دے رہی تھی، لندن فلیٹس کا 13 سال کا کرایہ 30 کروڑ بنا ہے۔

عمران خان کا کہنا تھا کہ قطری کرپٹ ترین آدمی ہے اس پر کیسز ہیں، ایل این جی اورپورٹ قاسم کا کنٹریکٹ قطری کودیا گیا، وہ پاکستانی قوم کونقصان پہنچا کرقطری کو فائدہ پہنچا رہے ہیں، التوفیق کا پیسا کہاں سے آیا، کہتے ہیں قطری سے آیا، جب سےسپریم کورٹ میں آئے ہیں قطری ون اورقطری ٹوآگیا ہے، پچھلے 7 ماہ میں ان لوگوں نے کبھی قطری کا نام نہیں لیا، ان کی ساری منی ٹریل قطری ہے۔ عمران خان نے کہا کہ وزیراعظم کی تلاشی لی جارہی ہے تو وہ قانون کے پیچھے چھپ رہے ہیں جب کہ وزیراعظم قانون کے پیچھے نہیں چھپ سکتے ہیں۔