اسلام آباد ایئرپورٹ سے بڑی تعداد میں سونا اور ہیروئن اسمگل کرنے کی کوششیں ناکام

راولپنڈی: بے نظیر بھٹو انٹرنیشنل ائیرپورٹ سے کروڑوں روپے مالیت کا سونا، ہیروئن اور موبائل فونز اسمگل کرنے کی کوششیں ناکام بنا کر 3 ملزمان کو حراست میں لے لیا گیا۔

ایکسپریس نیوز کے مطابق ایئر پورٹ سیکیورٹی فورس نے بے نظیر بھٹو انٹرنیشنل ائیرپورٹ پر  کارروائی کرتے ہوئے دبئی جانے والے مسافر ندیم اختر کے قبضے سے 35 تولے سونے کے بسکٹ برآمد کر لئے، ملزم سونا اپنی جیکٹ میں چھپا کر دبئی اسمگل کر رہا تھا جسے حراست میں لے کر کسٹم حکام کے حوالے کر دیا گیا ہے۔

اے ایس ایف کی جانب سے دوسری کارروائی کے دوران یوگنڈا جانے والی پرواز کے مسافر امین کے سامان سے ایک کلو ہیروئن برآمد کی گئی جس کی مالیت عالمی منڈی میں کروڑوں روپے بنتی ہے، مسافرکا تعلق پشاور سے ہے جو ویل چیئر پر تھا۔

اس خبرکو بھی پڑھیں: اسلام آباد ائیرپورٹ پر ہیروئن اسمگل کرنے کی کوشش ناکام

بے نظیر انٹرنیشنل ائیرپورٹ پر ہی تیسری کارروائی میں دبئی سے آنے والے مسافرکے ہینڈ بیگ سے 62 آئی فونز اور 5 ٹیبلٹس برآمد کیے گئے، ملزم ریڈ چینل کے ذریعے ہینڈ بیگ لاوٴنج سے باہرلے جانے کی کوشش کر رہا تھا کہ اسے دھر لیا گیا۔ ڈی سی کسٹم کا کہنا ہے کہ ریڈ چینل پر پکڑنے جانے پر ملزم نے ہینڈ بیگ کی ملکیت ہی تسلیم نہ کی جس کے بعد ہینڈ بیگ پر لگے ایئر لائن ٹیگ سے ملزم کی شناخت کر کے اسے گرفتارکیا گیا۔

لاہور کے علامہ اقبال انٹرنیشنل ایئرپورٹ پر بھی ساہیوال کا رہائشی نعیم قطر ایئرلائن کی پرواز کیو آر 621 سے ڈھائی کلو گرام ہیروئن لے کر بیرون ملک جا رہا تھا۔ اے ایس ایف اہلکاروں نے شک کی بنیاد پر مسافر کے سامان کی چیکنگ کی تو  معلوم ہوا کہ مسافر نے مالٹوں کو اندر سے خالی کر کے ان میں ہیروئن چھپا رکھی تھی۔ اے ایس ایف کے مطابق ملزم نعیم ہیروئن لاہور سے دوحا قطر لے جانا چاہتا تھا جبکہ ملزم کو حراست میں لے کر تفتیش شروع کر دی گئی ہے۔