فیصل آباد میں نجی فلائنگ کلب کا تربیتی طیارہ گرکرتباہ، انسٹرکٹر اور ٹرینی پائلٹ جاں بحق

فیصل آباد: نجی فلائنگ کلب کا تربیتی طیارہ گرکر تباہ ہونے سے اس میں سوار ٹریننگ انسٹرکٹر اور زیر تربیت پائلٹ جاں بحق ہوگئے۔

فیصل آباد میں ہوا بازی کی سہولت فراہم کرنے والے نجی ادارے شاہین فلائنگ کلب کا تربیتی طیارہ اڑان بھرنے کے فوراً بعد ہی فنی خرابی کے باعث فضا میں چکر لگانے لگا، طیارے کو فوری طور پر اتارنے کی کوشش کی گئی لیکن اسی دوران ہی طیارہ گرکر تباہ ہوگیا۔

حادثے کے نتیجے میں طیارے میں سوار ٹریننگ انسٹرکٹر اور زیر تربیت پائلٹ موقع پر ہی جاں بحق ہوگئے جن کی لاشیں قریبی اسپتال منتقل کردی گئی ہیں۔ فلائنگ کلب کی انتظامیہ کا کہنا ہے کہ ابتدائی طور پر یہ کہا جاسکتا ہے کہ حادثہ طیارے میں فنی خرابی کے باعث پیش آیا تاہم اس حوالے سے کوئی بھی حتمی بات تحقیقات مکمل ہونے کے بعد ہی کی جاسکے گی۔

دوسری جانب تربیتی طیارے کے گرنے کی تحقیقات کا حکم دے دیا گیا جب کہ شاہین ایئرفلائنگ ٹریننگ اسکول کو سیل کردیا گیا اور تحقیقات کے لیے ریکارڈ بھی قبضہ میں لے لیا گیا ہے۔