مارگلہ ہلز کی سیر حصہ دوسرا

ٹریل 5 کا اختتام پیر سوہاوہ روڈ پر ہوتا ہے۔ اگر آپ تقریباً 500 میٹر مغرب کی جانب چلیں تو ’’مونال ریسٹورنٹ‘‘ پہنچ جائیں گے۔ یہاں آپ اسلام آباد کے نظاروں سے لُطف اندوز ہوسکتے ہیں۔

---

ٹریل 5 (ڈیرہ جنگلاں، Darra Janglan)، اسلام آباد

ٹریل 5 (ڈیرہ جنگلاں) جدید سہولیات سے آراستہ، آسان، خوبصورت محفوظ ٹریل ہے۔ یہ نئے اور باقاعدہ ہائیکرز کے لئے یکساں مفید ہے۔ اِس ٹریل پر آپ کو خوبصورت و نایاب پرندے مختلف جانور (بندر، گیدڑ، لومڑیاں اور چیتے) ملیں گے، سرسبز اور خوبصورت پودوں (فلورہ اور فلونہ) کا ایک سلسلہ ملے گا، ٹھنڈے میٹھے پانی کے جھرنے ملیں گے، یہاں آپ کو پرندوں کی سریلی چہچہاہٹ، درختوں کی ٹھنڈی چھاؤں اور چھوٹے چھوٹے پتھروں میں سے گزرنے والے پانی کی موسیقی ملے گی۔



یقیناً یہ آپ کی زندگی کا منفرد تجربہ ہوگا۔ آپ ٹریل 5 پر ہائیکنگ کرکے اپنے آپ کو تر و تازہ، ہلکا پھلکا اور پُرسکون پائیں گے۔ جب آپ فطرت سے قریب ہوں گے تو آپ کے ذہن کی بہت سی گرہیں کُھلیں گی۔ آپ کو سوچنے کے لئے نئی سمت ملے گی۔ شہر کے ہنگام کے مقابلے میں آپ کو تسکین اور فرحت کا احساس ہوگا۔



مارگلہ ہِلز کی سیر ( پہلا حصہ)

ٹریل 5 کا محل وقوع

سیکٹر F-5 کی مخالف سمت، مارگلہ روڈ کے بالکل آخر پر آپ کو ٹریل 5 کا بورڈ اور پارکنگ نظر آئے گی۔ ٹریل 5 اور ٹریل 3 مارگلہ ایونیو پر قریب قریب ہی ہیں۔ اگر آپ پبلک ٹرانسپورٹ سے آنا چاہیں تو راولپنڈی ہائی وے سے 21 اور 136 نمبر روٹ اور مری روڈ سے 1 نمبر روٹ کی گاڑیاں آغا خان روڈ (میریٹ ہوٹل) تک آتی ہیں۔ آغا خان روڈ (میریٹ ہوٹل) کے پاس اُتر کر آپ اتاتُرک ایونیو سے ٹریل 5 (تقریباً 2 کلو میٹر) تک گاڑی میں 7 منٹ اور پیدل تقریباً 30 منٹ میں پہنچ سکتے ہیں۔ اِسی طرح آغا خان روڈ (میریٹ ہوٹل) کے پاس اُتر کر آپ اتا تُرک ایونیو سے ٹریل 3 (تقریباً 1.8 کلو میٹر) تک گاڑی میں 5 منٹ اور پیدل تقریباً 24 منٹ میں پہنچ سکتے ہیں۔ جن ہائیکرز کے پاس اپنی کنوینس نہیں وہ اِس راستے سے باآسانی ٹریل 5 اور 3 تک پہنچ سکتے ہیں اور ہائیکنگ کے منفرد تجربہ سے لطف اندوز ہوسکتے ہیں۔



 

ٹریل 5 کا فاصلہ

ٹریل 5 کا کُل فاصلہ 5 کلومیٹر ہے جسے طے کرنے میں تقریباً 3 سے ساڑھے تین گھنٹے لگتے ہیں۔ اگر رفتار تھوڑی تیز ہو تو ڈھائی سے ساڑھے 3 گھنٹے میں بھی طے کیا جاسکتا ہے۔ راستے میں تقریباً 2 کلومیٹر تک آبشار اور پانی میسر ہے۔ ابتدائی ٹریل آسان جو آگے آہستہ آہستہ مشکل ہوتا جاتا ہے۔ ٹریل 5 اور 3 متوازی چلتے ہیں، ٹریل 4 جو کہ ڈھائی کلومیٹر پر مشتمل ہے وہ اِن دونوں کو آپس میں ملاتا ہے۔

 

آپ کو کن اشیاء کی ضرورت پڑے گی؟

اگر آپ نے ٹریل 5 پر ہائیکنگ کرنے کا فیصلہ کرلیا ہے تو آپ کو مندرجہ ذیل اشیاء کی ضرورت ہوگی۔

• اچھے آرام دہ جوتوں کا جوڑا جو کہ واٹر پروف ہو.


• فرسٹ ایڈ کا سامان


• پانی کی بوتل، کھانے پینے کی اشیاء


• ڈیجیٹل کیمرہ


• دھوپ کا چشمہ، کیپ

 

ٹریل 5 کی نمایاں خصوصیات

• جدید سہولیات سے آراستہ


• سیکیورٹی کے مکمل انتظامات


• پبلک ٹرانسپورٹ سے قریب تر


• محفوظ اور کشادہ پارکنگ


• راستے میں پانی کا میسر ہونا


• قدرتی حسن اور دلکش مناظر سے بھرپور


• فیملیز کے لئے سب سے بہتر

 

ٹریل 5 کا اختتام

ٹریل 5 کا اختتام پیر سوہاوہ روڈ پر سیکیورٹی چیک پوسٹ کے قریب ہوتا ہے۔ اگر آپ تقریباً 500 میٹر مغرب کی جانب چلیں تو ''مونال ریسٹورنٹ'' پہنچ جائیں گے۔ یہاں آپ اسلام آباد کے نظاروں سے لُطف اندوز ہوسکتے ہیں۔





شہر کی مصروف زندگی سے وقت نکالیں اور فطرت کی دلکشی کو محسوس کییجئے۔ اسلام آباد کے مختلف کلب اور سوسائٹیز سی ڈی اے کے ساتھ مل کر واک، ہائیکنگ اور کلیمبنگ ایونٹس کا انعقاد کرتی رہتی ہیں۔ آپ گروپ کی شکل میں اور انفرادی طور پر اپنے خاندان کے ساتھ ویک اینڈ پر ایسے ٹریلز اور شاہدرہ پکنک پوائنٹ پر جائیں، یقیناً آپ کی زندگی کا منفرد تجربہ ہوگا۔

 

ایک حسین یاد ایک لازوال تجربہ

الپائن کلب اور سی ڈی اے کے تعاون سے منعقدہ ایک دن کی ہائیکنگ (ٹریل 5) میں مجھے شرکت کا موقع ملا۔ وہ دن بہت ساری پُرلطف یادوں، حسین لمحوں اور محبت بھرے ساتھیوں کی الفت و عنایت کے ساتھ میری زندگی کا ایک یادگار دن ہے۔ جس کا خیال آتے ہی میری روح کو تسکین ملتی ہے، میرا چہرا خوشی سے کِھل اُٹھتا ہے اور میرا دل پھر وہاں جانے کو مچلتا ہے۔ وہ دن ایک حسین یاد، ایک لازوال تجربے کے ساتھ میری زندگی کا اب حصہ ہے۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹویٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کریں۔