بھارتی فوج کی ایل اوسی پر بلااشتعال فائرنگ سے 2 شہری زخمی آئی ایس پی آر

بھارتی اشتعال انگیزی پر پاک فوج کی جانب سے بھی موثر جوابی کارروائی کی گئی، ترجمان پاک فوج. فوٹو؛ فائل

---

لاہور: بھارتی فوج کی لائن آف کنٹرول چری کوٹ سیکٹرپر بلااشتعال فائرنگ سے 2 شہری زخمی ہو گئے جس کے بعد پاک فوج کی جانب سے بھی موثر جوابی کارروائی کی گئی۔

پاک فوج کے شعبہ تعلقات عامہ (آئی ایس پی آر) کے مطابق بھارتی فورسز نے ایک بار پھر ہٹ دھرمی کا مظاہرہ کرتے ہوئے لائن آف کنٹرول چری کوٹ سیکٹرپر بلااشتعال فائرنگ کی جس کے نتیجے میں 2 شہری زخمی ہوگئے جن میں 60 سالہ بزرگ اور15 سالہ لڑکی شامل ہیں جنہیں طبی امداد کے لئے سول اسپتال عباس پورمنتقل کردیا گیا ہے۔

اس خبر کو بھی پڑھیں :ایل او سی پر ایک بار پھر بھارتی فوج کی اشتعال انگیزی

پاک فوج کے ترجمان کا کہنا ہے کہ بھارتی فوج سویلین آبادی کونشانہ بنارہی ہے اور اس بار بھارتی فوج نے چفارگاؤں کی آبادی کو نشانہ بنایا جب کہ بھارتی اشتعال انگیزی پر پاک فوج کی جانب سے بھی موثرجوابی کارروائی کی گئی جس کے بعد بھارتی بندوقیں خاموش ہو گئیں۔

واضح رہے بھارتی فوج کی جانب سے صبح بھی ایل او سی پر بلااشتعال فائرنگ کی گئی تھی جس کے بعد پاک فوج کی جانب سے بھرپور جوابی کارروائی کی گئی جب کہ لائن آف کنٹرول اور ورکنگ باؤنڈری پر بھارتی سیکیورٹی فورسز کی مسلسل اشتعال انگیزی کی وجہ سے اب تک کئی عام شہری شہید جب کہ درجنوں زخمی ہوچکے ہیں۔