صبا قمربالی ووڈ فلم ’’ہندی میڈیم‘‘ کی تشہیری مہم سے آؤٹ

ممبئی: بالی ووڈ میں قدم رکھنے والی پاکستانی اداکارہ صبا قمر کو ان کی پہلی فلم’’ ہندی میڈیم‘‘ کی بھارت میں ہونے والی تشہیری مہم سے باہر کردیا گیا ہے۔

بھارتی پروڈیوسرز ایسوسی ایشن نے پاکستانی فنکاروں کے بالی ووڈ میں کام کرنے پر پابندی عائد کررکھی ہے اورجب یہ پابندی عائد کی گئی تو اُس وقت زیرتکمیل فلموں میں پاکستانی اداکاروں کو کام کرنے کی اجازت دی گئی تھی ان میں سے ہی ایک فلم ’’ہندی میڈیم‘‘ بھی تھی جس میں پاکستانی اداکارہ صبا قمر ہیروئن کا کردار ادا کررہی ہیں لیکن  ماہرہ خان کی طرح صبا قمر کو بھی فلم کی تشہیری مہم سے باہر کردیا گیاہے۔

اس خبر کو بھی پڑھیں:ماہرہ شاہ رخ کے ساتھ تشہیر نہ ہونے پر رو پڑیں

بھارتی میڈیا رپورٹس کے مطابق  اداکارعرفان خان کے مدمقابل فلم’’ہندی میڈیم‘‘ سے بالی ووٖڈ میں اپنا فنی سفر شروع کرنے والی پاکستانی اداکارہ صبا قمر ان دنوں جارجیا کے دارالحکومت تبلیسی میں جاری فلم کی شوٹنگ میں مصروف ہیں لیکن اداکارہ کو بھارت میں فلم کی تشہیری مہم سے آؤٹ کردیا گیا ہے جس کی تصدیق فلم کے پروڈیوسر نے بھی کردی ہے۔

اس خبر کو بھی پڑھیں:فواد خان، صبا قمر اور ماہرہ خان سے خوفزدہ

فلم پروڈیوسر بھوشن کمار کا کہنا تھا کہ صبا قمر فلم کی تشہیری مہم میں حصہ لینے کے لیے بھارت نہیں آئیں گی لیکن فلم پاکستان میں نمائش کے لیے ضرور پیش کی جائے گی جب کہ فلم میں عاطف اسلم کی آواز میں گیت کو بھی شامل کیا گیا ہے۔

واضح رہے کہ عرفان خان اور صبا قمر کی فلم ’’ہندی میڈیم‘‘ 12 مئی کو نمائش کے لیے پیش کی جائے گی۔