بوبی دیول کی فلم ’’ریس تھری‘‘ میں انٹری

 ممبئی: بالی ووڈ اداکار بوبی دیول سلمان خان کی فلم ’’ریس تھری‘‘ میں اداکاری کے جوہر دکھائیں گے۔

بالی ووڈ کے نامور اداکار دھرمیندر نے فلم انڈسٹری میں خوب پذیرائی حاصل کی لیکن ان کے بیٹے بوبی دیول کا فلمی کیریئر آغاز سے ہی زوال کا شکار رہا، یہی وجہ ہے کہ وہ اچھی فلموں میں کام نہ کرسکے تاہم اداکار کو حال میں ریلیز ہونے والی فلم ’پوسٹر بوائے‘ سے بہت امیدیں وابستہ تھی جس میں ان کے بھائی سنی دیول نے بھی ادکاری کے جوہر دکھائے البتہ وہ فلم بھی مکمل طور پر ناکام رہی جس کے بعد بوبی دیول کی رہی سہی امید بھی ختم ہوگئی لیکن اب انہیں ایک بڑی فلم میں کام کرنے کا موقع ملا ہے جو ان کے ڈوبتے کریئر کو سہارا دے سکتا ہے۔

Welcome to the family #BobbyDeol @BeingSalmanKhan @Asli_Jacqueline #Race3 #Eid2018

— Ramesh Taurani (@RameshTaurani) October 11, 2017

بھارتی میڈیا رپورٹس کے مطابق بالی ووڈ کے سلطان سلمان خان کی فلم ’ریس تھری‘ میں بوبی دیول کو کاسٹ کرلیا گیا جس کا اعلان فلمساز رمیش ترانی نے ایک ٹوئٹ کے ذریعے کیا جس میں انہوں نے سلمان خان اور جیکولین فرنینڈس کے بعد بوبی دیول کو بھی ’ریس‘ کی فیملی میں خوش آمدید کہا، جب کہ ساتھ ہی انہوں نے فلم کی ریلیز کا بھی اعلان کیا جو اگلے سال عید پر سینماگھروں کی زینت بنے گی۔

اس خبر کو بھی پڑھیں؛ سلمان خان ’ریس تھری‘ کا حصہ بن گئے

دوسری جانب بوبی دیول کی ’ریس تھری‘ میں شامل ہونے سے دیگر اداکاروں سے متعلق تمام قیاس آرائیاں بھی دم توڑ گئی ہیں، اس سے قبل میڈیا رپورٹس میں سدھارتھ ملہوترا، ادتیا پنچولی اور عمران ہاشمی کو فلم میں کاسٹ کرنے کی خبریں زیر گردش تھیں۔

واضح رہے ریس کے پہلے دونوں سیکوئل میں سیف علی خان نے لیڈ رول کیا تھا اور دونوں فلمیں باکس آفس پر کامیاب رہی تھیں لیکن ’’ریس تھری‘‘ میں سلمان خان کے شامل ہونے کے بعد سیف علی خان نے فلم کا حصہ بننے سے انکار کردیا تھا۔