مسافر کے گیس خارج کرنے پر جہاز کی ایمرجنسی لینڈنگ

ویب ڈیسک  اتوار 18 فروری 2018
گیس خارج کرنے والے مسافر نے جہاز کی ایمرجنسی لینڈنگ کرادی،فوٹو:فائل

گیس خارج کرنے والے مسافر نے جہاز کی ایمرجنسی لینڈنگ کرادی،فوٹو:فائل

ویانا: دبئی سے ہالینڈ جانے والی پرواز کوایک مسافر کی طرف سے مسلسل گیس خارج کرنے پر ہنگامی لینڈنگ کرنا پڑ گئی ۔

عموماً فضائی سفر کے دوران کوئی فنی خرابی یا کسی بڑی پریشانی کے سبب ہوائی جہاز کی ایمرجنسی لینڈنگ کرائی جاتی ہے تاہم  اس بار ایک عجیب و غریب واقعے کے باعث پائلٹ کو طیارہ منزل سے پہلے ہی راستے میں اتارنا پڑگیا۔

بین الاقوامی میڈیا رپورٹس کے مطابق دبئی سے ہالینڈ کے دارالحکومت ایمسٹرڈیم جانے والی ٹرانساویا ایئرلائن کی پرواز نے شیڈول کے مطابق اڑان بھری  ، ابتداء میں سب کچھ ٹھیک رہا تاہم  آگے کچھ ایسا ہوا جو لوگوں کے وہم و گمان میں ہی نہ تھا۔

یہ خبر بھی پڑھیں: شہد کی مکھی نے طیارے کو ایمرجنسی لینڈنگ پرمجبورکردیا

دوران سفر  جہاز کا اندرونی ماحول اس وقت خراب ہونے لگا جب ایک مسافر کے گیس خارج کرنے کا نہ رکنے والا عمل شروع ہوا جس پر آس پاس بیٹھے مسافروں نے عملے سے شکایت کی تاہم توجہ دلانے کے باجود مذکورہ شخص بے قابو ہوکرلگاتار گیس خارج کرتا رہا۔

جب مسافروں کے صبر کا پیمانہ لبریز ہوا تو انہوں نے براہ راست جا کر پائلٹ کے سامنے معاملہ بیان کیا، کپتان سے شکایت  پر وہ شخص آگ بگولہ ہوگیا اور طیش میں آکرمسافروں سے جھگڑنے لگا جس پر مسافر نشستوں سے کھڑے ہوگئے اور شورشرابا شروع ہوگیا۔

مسافروں میں تلخی بڑھنے لگی تو کپتان نے منزل پر پہنچنے سے قبل ہی آسٹریا کے شہر ویانا کے  ہوائی اڈے پر جہاز کی ایمرجنسی لینڈنگ کرادی جس کے بعد سیکورٹی فورسز نے جہاز میں داخل ہوکر 4 مسافروں کو حراست میں لے لیا اور پرواز کو اپنی منزل کی جانب روانہ کردیا۔

ٹرانساویا ایئرلائن کے ترجمان نے واقعے کی تصدیق کرتے ہوئے بتایا  کہ انہوں نے حراست میں لیے گئے مسافروں پر سفری پابندی عائد کردی  اور ہمیشہ ہمیشہ کے لیے ان مسافروں پر ٹرانساویا ایئرلائن کے دروازے بند کردیے گئے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔