کرکٹ میں چیٹنگ آئی سی سی کو سخت اقدامات کرنا ہوں گے نجم سیٹھی

پاکستان میچ فکسنگ،بال ٹیمپرنگ سمیت ہرقسم کی منفی چیزوں کیخلاف ہے، چیئرمین

Sports Desk April 24, 2018

ششانک کے عہدے میں توسیع کا معاملہ جب میٹنگ میں سامنے آیا تو دیکھیں گے۔ فوٹو:فائل

پی سی بی کے چیئرمین نجم سیٹھی نے واضح کیا ہے کہ پاکستان کھیل میں میچ فکسنگ، بال ٹیمپرنگ سمیت ہر قسم کی چیٹنگ کے خلاف ہے۔

نجم سیٹھی نے بھارتی خبررساں ایجنسی کو انٹرویو میں کہاکہ پی سی بی ہر قسم کی چیٹنگ کیخلاف سخت خیالات رکھتا اور آئی سی سی کو بھی اس حوالے سے سخت اقدامات کرنا ہوں گے۔

چیئرمین پی سی بی نے کہا کہ چیٹنگ کسی بھی صورت میں ہو اسے ختم ہونا چاہیے، جو بھی اس میں ملوث پایا جائے اس کو بھی سخت سزائیں دینا چاہئیں، میچ فکسنگ، اسپاٹ فکسنگ، بال ٹیمپرنگ سب ہی دغابازی کے زمرے میں آتی ہیں، ہمیں ان پر سخت سزائیں دینا چاہئیں اور آئی سی سی کو بھی سخت اقدامات کرنے کی ضرورت ہے۔

نجم سیٹھی نے مزید کہا کہ پاکستان کرکٹ بورڈ چیٹنگ کے حوالے سے واضح سوچ رکھتا ہے، ہم سمجھتے ہیں کہ میچ فکسنگ، اسپاٹ فکسنگ اور بال ٹیمپرنگ وغیرہ سب ہی ایک جیسی چیزیں ہیں، ہم پہلے 2یا3 پلیئرز کو سخت سزا دے چکے اور امید کرتے ہیں کہ باقی بورڈز بھی ہماری طرح ایسی چیزوں پر سخت موقف اختیار کریں گے۔

آئی سی سی کے موجودہ چیئرمین ششانک منوہر کے عہدے میں توسیع کے حوالے سے سوال پر نجم سیٹھی نے کہاکہ جب میٹنگز میں اس بارے میں معاملہ سامنے آئے گا تو دیکھیں گے کہ کیا کرنا ہے۔

واضح رہے کہ آئی سی سی کی کولکتہ میں جاری پانچ روزہ میٹنگز کے ایجنڈے میں کھلاڑیوں کا رویہ بھی شامل ہے۔