سروسز اسپتال لاہور کے ڈاکٹر آپریشن کے دوران مریضہ کے پیٹ میں کپڑا بھول گئے

شہر بانو نقوی  بدھ 27 جون 2018
بیٹی کو ڈلیوری کیلئے 20 مئی کوسروسز اسپتال لایا جہاں ڈاکٹر صدف اور ڈاکٹر ارم نے آپریشن کیا، درخواست کا متن فوٹوبشکریہ شہربانونقوی

بیٹی کو ڈلیوری کیلئے 20 مئی کوسروسز اسپتال لایا جہاں ڈاکٹر صدف اور ڈاکٹر ارم نے آپریشن کیا، درخواست کا متن فوٹوبشکریہ شہربانونقوی

لاہور: سروسز اسپتال میں ڈاکٹروں نے مجرمانہ غفلت کا مظاہرہ کرتے ہوئے آپریشن کے دوران مریضہ کے پیٹ میں کپڑا چھوڑ دیا۔

ایکسپریس نیوز کے مطابق لاہور میں محمد اشفاق نامی شہری نے ہیلتھ کیئر کمیشن کو درخواست دی ہے جس میں کہا گیا ہے کہ اس کی بیٹی منسا فیصل کو زچگی کے لیے 20 مئی کو سروسز اسپتال لایا گیا جہاں ڈاکٹر صدف اور ڈاکٹر ارم نے اس کا آپریشن کیا، زچگی کے بعد منسا کو اسپتال سے چھٹی دے دی گئی لیکن کچھ دن بعد اس کی طبیعت خراب ہوگئی۔ شدید تکلیف کے باعث منسا کو جناح اسپتال لے جایا گیا لیکن بیٹی کی حالت دیکھتے ہوئے اسپتال کے عملے نے علاج سے معذرت کرتے ہوئے اسے دوبارہ سروسز اسپتال ریفر کردیا۔

محمد اشفاق کا کہنا ہے کہ 19 جون کو کئے گئے الٹرا ساؤنڈ میں اس بات کا انکشاف ہوا کہ منسا کے پیٹ میں آپریشن کے دوران کپڑا رہ گیا ہے۔ ڈاکٹروں نے منسا کے پیٹ سے وہ کپڑا نکال لیا ہے جو لیڈی ڈاکٹر نے آپریشن کے دوران چھوڑ دیا تھا تاہم وہ اب بھی زیر علاج ہے اور اس کی حالت ٹھیک نہیں۔ اسپتال کے ڈاکٹر مناسب جواب دینے کے بجائے مسلسل ٹال مٹول کر رہے ہیں۔

اشفاق کا کہنا ہے کہ میری بیٹی کی حالت خراب ہے لہٰذا ڈاکٹروں کو علاج معالجہ کا پابند بنایا جائے اس کے علاوہ ہیلتھ کیئر کمیشن غفلت کی مرتکب لیڈی ڈاکٹروں کے خلاف کارروائی بھی کرے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔