کراچی میں ایم کیوایم کا مینڈیٹ چرانے کی کوشش کی جارہی ہے فاروق ستار

ایم کیو ایم کے مینڈیٹ اور الیکشن کو یرغمال بنایا جارہا ہے، فاروق ستار. فوٹو: فائل

---

متحدہ قومی موومنٹ کے رہنما فاروق ستار نے کہا ہے کہ انتخابی عمل کے دوران ایم کیو ایم کے مینڈیٹ کو چرانے کی کوشش کی جارہی ہے اورشہرکے کئی پولنگ اسٹیشنز پر جرائم پیشہ افراد کا قبضہ ہے۔

کراچی میں رابطہ کمیٹی کے رکن رضا ہارون اور نبیل احمد خان گبول کے ہمراہ پریس کانفرنس کے دوران انہوں نے کہا کہ ایم کیو ایم کے مینڈیٹ اور الیکشن کو یرغمال بنایا جارہا ہے، 1988 سے قومی اسمبلی کے حلقہ این اے 249 پر ایم کیو ایم نے واضح برتری حاصل کی ہے، این اے 250 ،251 ،252 اور 253 پر بھی یہی صورتحال ہے لیکن ایک سوچے سمجھے منصوبے کے تحت ہمارا مینڈیٹ چوری کیا جارہا ہے، 100 سے زائد پولنگ اسٹیشنز پر انتخابی سامان وقت پر نہیں پہنچ پایا اور کئی گھنٹوں تک یہاں پولنگ شروع ہی کی جاسکی، دوسری جانب لیاری ٹاؤن کے کئی پولنگ اسٹیشنوں پر جرائم پیشہ افراد نے قبضہ جما رکھا ہے پولنگ شروع ہونے کے صرف آدھے گھنٹے بعد ہی ایم کیو ایم کے پولنگ ایجنٹس کو وہاں سے زبردستی بےدخل کردیا گیا اور وہاں لوگوں کو ووٹ ڈالنے سے روکا جارہا ہے۔

اس موقع پر ایم کیو ایم کی رابطہ کمیٹی کے رکن رضا ہارون نے کہا کہ ایک جانب الیکشن کمیشن کی جانب سے امیدواروں پر پولنگ سے 48 گھنٹوں قبل ہی انتخابی مہم ختم کرائی گئی، لیکن میڈیا میں بعض مبصرین انتخابات سے قبل ہی ممکنہ نتائج کی پیش گوئی کررہے ہیں کیونکہ وہ سمجھتے ہیں کہ اس طرح کسی جماعت کےلئےبالواسطہ انتخابی مہم چلائی جارہی ہے جو کسی بھی طرح ٹھیک نہیں۔ انہوں نے کہا کہ میڈیا کا کردار غیر جانبدار ہونا چاہئے، انتخابات کے نتائج سے پہلے میڈیا میں ممکنہ نتائج کے بارے میں پیش گوئی کرنا صحافتی اصولوں کے خلاف ہے۔

پریس کانفرنس کے دوران قومی اسمبلی کے حلقہ این اے 248 سے ایم کیو ایم کے امیدوار نبیل احمد گبول کا کہنا تھا کہ لیاری کے اکثر پولنگ اسٹیشنز پر گینگ وار کے ملزمان نے قبضہ جما رکھا ہے، ایک پولنگ اسٹیشن پر پریزائڈنگ افسر ہی لاپتہ ہے جبکہ کچھ مقامات پر کھلے عام بیلٹ پیپرز پر مہریں لگائی جارہی ہیں۔ جو کہ ایم کیو ایم کے مینڈیٹ کو چوری کرنے کی سازش ہے۔