QUETTA:
امریکا اور طالبان کے درمیان براہ راست مذاکرات کا آغاز کل سے قطر میں ہورہا ہے۔
غیر ملکی خبر رساں ادارے سے بات کرتے ہوئے اعلیٰ امریکی حکام نے کہا ہے کہ دوحہ میں ہونے والے مذاکرات میں طالبان اور امریکی قیادت کے علاوہ افغان حکومت کا ایک وفد بھی شریک ہوگا جس کے بعد طالبان اور افغان حکومت کے درمیان مذاکرات شروع ہوں گے۔ ابتدائی طور پر یہ مذاکرات کا سب سے اہم موضوع قیدیوں کا تبادلہ ہوگا لیکن اس مرحلے کی کامیابی تک پہنچنے کے لئے بھی کئی دن لگیں گے اس سے پہلے فریقین مذاکرات میں ایک دوسرے کی سنجیدگی اورموقف جاننے کی کوششیں کریں گے۔
امریکی حکام کا کہنا ہے کہ طالبان سے مذاکرات تشدد کے خاتمے، القاعدہ سے تعلقات توڑنے، افغان آئین کے احترام اور خواتین و بچوں کے حقوق کو ماننے کی شرائط پر کئے جارہے ہیں۔
واضح رہے کہ 2001 میں افغانستان پر امریکی حملے کے بعد یہ پہلا موقع ہے جب امریکا براہ راست طالبان سے مذاکرات کررہا ہے۔