مقبوضہ کشمیر میں مسلح افراد کی فائرنگ سے خاتون جاں بحق

قابض بھارتی فوج کے بعد اب نامعلوم مسلح افراد سرکاری سرپرستی میں کشمیریوں کو قتل کررہے ہیں۔ فوٹو : فائل

---

مقبوضہ کشمیر میں نامعلوم مسلح افراد نے اندھا دھند فائرنگ کر کے ایک خاتون نگینہ بانو کو قتل کردیا جب کہ ایک شخص شدید زخمی ہوگیا۔

بین الاقوامی خبر رساں ادارے کے مطابق فائرنگ کا واقعہ جنت نظیر وادی کے ضلع پلوامہ میں اُس وقت پیش آیا جب مسلح افراد نے عید کے پُر مسرت لمحات میں اندھا دھند فائرنگ کر کے ایک خاتون نگینہ بانو کو قتل کردیا، خاتون کے شوہر کو بھی 2017 میں قتل کردیا گیا تھا۔

مسلح افراد کی فائرنگ سے ایک شخص زخمی بھی ہوا جس کی شناخت محمد سلطان کے نام سے ہوئی ہے، ہلاک اور زخمی ہونے والوں کو قریبی اسپتال منتقل کردیا گیا ہے، پولیس نے مقدمہ درج کرکے تفتیش کا آغاز کردیا ہے۔

واضح رہے کہ گزشتہ روز بھی نامعلوم مسلح افراد نے فائرنگ کر کے سری نگر کے علاقے پٹنہ چوک میں 32 سالہ سمیر احمد نامی نوجوان کو قتل کردیا تھا۔ ایک جانب تو قابض بھارتی فوج کی جانب سے کشمیری نوجوانوں کی شہادت کا سلسلہ جاری ہے تو دوسری جانب نامعلوم مسلح افراد سرکاری سرپرستی میں نہتے کشمیریوں کو نشانہ بنا رہے ہیں۔