بہادر شہری نے رقم لوٹنے والے ڈاکوؤں کو گاڑی سے کچل دیا

شہریوں نے 2ڈاکوؤں کوپکڑکرتشددکانشانہ بناڈالا،دونوں کی شناخت عمران اورماجدکے نام سے ہوئی،تھانیدارفیروزآباد۔ فوٹو:فائل

---

بہادرشہری نے لوٹ مار کرکے فرارہونے والے ڈاکوؤں کی موٹرسائیکل کوگاڑی سے ٹکر مارکرگرادیا جب کہ موقع پرموجود شہریوں نے ڈاکوؤں کو تشدد کا نشانہ بنا کرپولیس کے حوالے کردیا۔

فیروز آباد تھانے کی حدود ٹیپو سلطان ٹریفک سنگل پر2موٹر سائیکلوں پر سوار4 ڈکیت گاڑی میں سوارمرتضیٰ علی سے رقم چھین کر فرار ہورہے تھے۔ شہری نے بہادری کا مظاہرہ کرتے ہوئے اپنی گاڑی سے ڈاکوؤں کاپیچھاکیااورایک موٹر سائیکل کو ٹکرماردی جس کے باعث 2 ڈاکو سڑک پرگرگئے جبکہ ان کے 2ساتھی موقع سے فرار ہونے میں کامیاب ہوگئے، موقع پر موجود شہریوں کی بڑی تعداد نے ڈاکوؤں کو پکڑکرتشدد کا نشانہ بنادیا۔

پولیس نے موقع پر پہنچ کرڈاکوؤں کوشہریوں کے چنگل سے چھڑایا،ایس ایچ او فیروز آباد اورنگزیب خٹک نے بتایا کہ گرفتار ڈاکوؤں کے قبضے سے2 ٹی ٹی پستول ،ایک موٹرسائیکل اورشہری سے چھینی جانے والی رقم برآمدکرلی ہے۔

انھوں نے بتایا کہ شہری مرتضیٰ علی ڈیفنس فیز 2 ایکسٹیشن میں نجی بینک سے ایک لاکھ روپے کیش نکلواکرجا رہے تھے کہ2 موٹرسائیکل پر سوار4 ڈاکوؤں نے ان کا تعاقب شروع کردیا اورشہری جب ٹیپو سلطان سنگل پر پہنچاتوڈاکوؤں نے اسے لوٹ لیا،گرفتار ڈاکوؤں کی شناخت عمران ولد کریم اورماجد ولد داؤد کے نام سے کر لی گئی ہے جبکہ ان کا کرمنل ریکارڈ بھی چیک کیا جا رہا ہے۔