قومی ٹی 20 کرکٹ زرعی ترقیاتی بینک نے ٹرافی پر قبضہ جمالیا

لاہور: قومی ڈپارٹمنٹل ٹی ٹوئنٹی چیمپئن بننے والی زرعی ترقیاتی بینک کی ٹیم کا ٹرافی کے ہمراہ گروپ فوٹو،فائنل میں سوئی ناردرن گیس کو 78رنز سے شکست ہو گئی۔ فوٹو: طارق حسن/ایکسپریس

---

زرعی ترقیاتی بینک نے قومی ٹی20 ڈپارٹمنٹل ٹورنامنٹ کی ٹرافی پر قبضہ جما لیا، اس نے فائنل میں سوئی ناردرن گیس کو 78 رنز کے بڑے مارجن سے شکست دی۔

دورئہ سری لنکا کیلیے پاکستانی اسکواڈ میں شامل کیے جانے والے حارث سہیل اور شرجیل خان کے ساتھ عمران نذیر کی عمدہ بیٹنگ نے زیڈ ٹی بی ایل کی ٹائٹل فتح میں اہم کردار ادا کیا،رنر اپ سائیڈ کے مصباح الحق صفر کی خفت سے دوچار ہوئے، اوپنرز توفیق عمر اور محمد رضوان بھی کھاتے کھولنے میں ناکام رہے، عثمان شنواری نے5 وکٹیں لیں، انھوں نے ابتدائی2اوورز میں کوئی رن دیے بغیر 4 پلیئرز کو میدان بدر کیا تھا، ساتھی کھلاڑی عمران خان نے 3 کھلاڑیوں کو آئوٹ کیا۔ تفصیلات کے مطابق قومی ٹوئنٹی 20 کرکٹ ٹورنامنٹ زیڈ ٹی بی ایل کی فتح کے ساتھ لاہور میں اختتام پذیر ہوگیا، فائنل میں سوئی ناردرن گیس کو 78رنز کے بڑے مارجن سے شکست کا سامنا کرنا پڑا۔



قذافی اسٹیڈیم لاہورکی مصنوعی روشنیوں میں سوئی ناردرن گیس نے ٹاس جیت کر بولنگ کا فیصلہ کیا،کپتان توفیق عمر کو اس وقت اپنی غلطی کا احساس ہوا جب زیڈ ٹی بی ایل کے اوپنرز سمیت دیگر بیٹسمینوں نے شانداربیٹنگ کا مظاہرہ کرتے ہوئے بولرز کو بے بس کیے رکھا، عمران نذیر اور شرجیل خان نے ٹیم کو 85 کا مضبوط آغاز فراہم کیا، شرجیل خان 4 چوکوں اور 2 چھکوں کی مدد سے 45رنز بنانے کے بعد عمران علی کی گیند پربولڈ ہوگئے، مجموعے میں محض ایک رن کے اضافے سے عمران نذیرنے بھی پویلین کی راہ لی، انھوں نے 39رنزبنانے کیلیے 26 گیندیں استعمال کیں، یاسر حمید نے پُراعتماد انداز سے کھیلتے ہوئے32 رنز جوڑے، حارث سہیل نے 5 چوکوں اور3 چھکوں کی مدد سے 58رنزکی ناقابل شکست اننگز کھیل کر زیڈ ٹی بی ایل کا اسکور 184 رنز تک پہنچایا، شاہد یوسف 8 پر ناٹ آئوٹ رہے، عمران علی نے 2 جبکہ بلاول بھٹی نے ایک وکٹ حاصل کی۔ 185کا ہدف پانے و الی اسٹارز سے سجی سوئی ناردرن گیس کی ٹیم 106رنز پر ہمت ہاربیٹھی، اوپنرزتوفیق عمر اور محمد رضوان کو کھاتہ کھولنے کا موقع نہیں ملا۔

مصباح الحق بھی بغیر کوئی رن بنائے عثمان کی گیند پر شکیل انصر کا شکار بن گئے، 9کے مجموعی اسکور پر سوئی گیس کی4 جبکہ 38 اسکور پر7وکٹیں گر چکی تھیں۔ عمر اکمل 19 رنز بنا کر عمران خان کی گیند پر آئوٹ ہو ئے، ٹیم کے سب سے کامیاب بیٹسمین بلاول بھٹی رہے جنھوں نے 38رنز بنائے، عثمان خان نے5 کھلاڑیوں کو پویلین کا راستہ دکھایا جبکہ عمران خان نے 3 وکٹیں اپنے نام کیں، سعید اجمل اور زوہیب خان کو ایک ایک وکٹ ملی، ایونٹ کے اختتام پر فاتح زیڈ ٹی بی ایل کو 20 لاکھ روپے کی انعامی رقم دی گئی جبکہ رنر اپ سوئی ناردرن کے حصے میں 10 لاکھ کا کیش ایوارڈ آیا، فائنل کے ہیرو عثمان خان کو 50 ہزار روپے دیے گئے،انھیں ایونٹ میں 11وکٹوں کے ساتھ بہترین بولر ، پی آئی اے کے سرفراز احمد کو 250رنز اسکور کرنے پر بہترین بیٹسمین جبکہ پی ٹی وی کے زوہیب احمد کو 141رنز اور 10وکٹوں کی مجموعی پرفارمنس ٹورنامنٹ کا بہترین آل رائونڈر چناگیا، مذکورہ تینوں شعبے میں بھی ہر کھلاڑی کو 50،50 ہزار روپے انعام ملا۔