چین میں انتظامیہ نے کورونا میں مبتلا بلیوں کو ہلاک کردیا

تحقیق کے مطابق بلیاں کورونا وائرس کو جسم میں محفوظ رکھتے ہوئے اسے انسانوں میں منتقل کرسکتی ہیں۔

---

چینی حکام نے کورونا مثبت آنے پر تین پالتو بلیوں کو ہلاک کردیا ہے۔

بیجنگ نیوز آن لائن کے مطابق چین کے جنوبی شہر ہربِن میں حکام نے کورونا مثبت والی پالتو بلیوں کو محض اس لیے موت کے گھاٹ اتار دیا کیوں کہ ان کے پاس کووڈ 19 میں مبتلا جانوروں کے لیے کوئی علاج نہیں تھا۔ حکام کا کہنا ہے کہ ان بلیوں کی وجہ سے ان کی مالکن اور اطراف میں رہنے والے افراد کے کورونا میں مبتلا ہونے کے خطرات میں اضافہ ہوگیا تھا۔

رپورٹ کے مطابق رواں ماہ کی 21 تاریخ کو ان بلیوں کی مالکن مس لیو کا کورونا ٹیسٹ مثبت آیا تھااور اس کے بعد وہ تینوں بلیوں کے لیے پانی اور کھانا رکھ کر قرنطینہ میں چلی گئیں تھی، صحت یابی کی بعد محکمہ صحت کے اہل کاروں نے ان کی بلیوں کا ٹیسٹ بھی کیا جو کورونا مثبت آیا۔ مس لیو نے اپنی بلیوں کی جان بچانے کے لیے آن لائن درخواست بھی کی تھی لیکن حکام نے گزشتہ روز بلیوں کو مار دیا۔

یاد رہے کہ امریکا کے مرکز برائے بیماریوں سے تحفظ اور کنٹرول کے مطابق کووڈ 19 وائرس انسانوں سے جانوروں میں منتقل ہوسکتا ہے اور کئی ممالک میں کورونا کے انسانوں سے جانوروں میں منتقل ہونے کے کئی کیسز بھی سامنے آچکے ہیں۔

یہ بھی پڑھیے: بستر پرساتھ سونے والی پالتوبلی کورونا پھیلاسکتی ہے، تحقیق

جب کہ جرمنی کی Utrecht یونیورسٹی میں ہونے والی تحقیق سے یہ بات سامنے آئی تھی کہ بلیاں کورونا وائرس کو اپنے جسم میں محفوظ رکھتے ہوئے ممکنہ طور پر انسانوں میں اس وائرس کو منتقل کرسکتی ہیں۔