تحریک انصاف وکلاء ونگ کا اپنی ہی حکومت کے خلاف احتجاج

ناکامی کی وجہ نا اہل لوگوں کو بڑے عہدے دینا ہے، شاہ فیصل الیاس۔ فوٹو:ایکسپریس

---

تحریک انصاف وکلاء ونگ نے گورنر اور وزیراعلیٰ خیبرپختون خوا کو ہٹانے کا مطالبہ کیا ہے۔

ایکسپریس نیوز کے مطابق خیبرپختون خوا میں تحریک انصاف وکلاء ونگ اپنی ہی صوبائی حکومت کے خلاف سراپا احتجاج ہے، اور انصاف لائرز فورم کی جانب سے حکومت کے خلاف شدید نعرے بازی کی جارہی ہے، جب کہ مظاہرین نے گورنر اور وزیراعلی خیبرپختون خوا کو عہدوں سے ہٹانے کا مطالبہ بھی کیا ہے۔

مظاہرین کا کہنا ہے کہ نااہل گورنر اور وزیراعلی خیبرپختون خوا کی وجہ سے صوبائی حکومت ناکام ہے، اپنے ورکرز کو نظر انداز کرکے دوسرے جماعتوں کے لوگوں کو عہدوں پر بٹھایا گیا ہے، اٹارنی جنرل اور ایڈوکیٹ جنرل آفس میں اے این پی، جے یو پی، پیپلزپارٹی اور جماعت اسلامی کے وکلاء لگائے ہیں، اگر ان ہی پارٹیوں کے لوگوں کو آگے لانا تھا تو ہمیں تبدیلی کے سبز باغ کیوں دکھائے گئے۔

سیکرٹری جنرل انصاف لائرز فورم شاہ فیصل الیاس کا کہنا تھا کہ حکومت ابھی تک ناکام ہے اور اس ناکامی کی وجہ نا اہل لوگوں کو بڑے عہدے دینا ہے، حکومت نے ہمارے ساتھی وکلاء کو بھی گرفتار کیا ہے جس کی مذمت کرتے ہیں، جب کہ احتجاج میں شرکت نہ کرنے کے لئے وکلاء پر دباؤ ڈالا گیا اور دھمکیاں دی گئی، ہم اپنا حق لے کر رہے گے، اور آئندہ احتجاج وزیراعظم ہاؤس کے سامنے ہوگا۔