فائنل میں شکست؛ شریاس ایر کی بہن کا بھائی کیلئے جذباتی پیغام وائرل

آسٹریلیا نے کپ جیتا لیکن آپ سب نے ہمارے دل جیت لئے، بہن شریستا

ویب ڈیسک منگل 21 نومبر 2023

آسٹریلیا نے کپ جیتا لیکن آپ سب نے ہمارے دل جیت لئے، بہن شریستا (فوٹو: ایکسپریس ویب)

آسٹریلیا کے ہاتھوں ہوم گراؤنڈ پر فائنل میں شکست کے بعد بھارتی کھلاڑیوں کی بیویاں اور اہل خانہ ٹیم کو سپورٹ کرنے لگے۔

سماجی رابطے کی سائٹ انسٹاگرام پر بھارتی کرکٹ ٹیم کے پلئیر شریاس ایر کی بہن شریستا نے بھائی کو جذباتی انداز میں خراج تحسین پیش کرتے ہوئے لکھا کہ میرے بھائی اور اس کی ٹیم کے لیے ایک تعریفی پوسٹ!۔

پیاری ٹیم انڈیا، آسٹریلیا نے کپ جیتا لیکن آپ سب نے ہمارے دل جیت لئے مجھے اپنی ٹیم پر بہت فخر ہے، ہاں میرا دل ٹوٹ گیا ہے کیونکہ ہم فائنل ہار گئے لیکن بطور ٹیم کوشش کرنے پر آپ کا احترام کرتی ہوں، ہم پہلے سے زیادہ مضبوط واپس آئیں گے۔

انہوں نے مزید لکھا کہ شریاس! میرے بھائی کی محنت کو کوئی نہیں جانتا جس نے یہاں تک پہنچنے کیلئے کتنی محنت کی! میں صرف یہ کہنا چاہتی ہوں کہ مجھے آپ پر ناقابل یقین حد تک فخر ہے۔ کل ہمارا دن نہیں تھا لیکن مجھے یقین ہے کہ ہم مضبوطی سے واپس آئیں گے۔

واضح رہے کہ شریاس ایر نے میگا ایونٹ میں بھارت کیلئے جارحانہ کھیل کا مظاہرہ کرتے ہوئے 66.25 کی اوسط سے 530 رنز بنائے۔

دوسری جانب بھارتی فینز کی جانب سے آسٹریلوی کھلاڑیوں اور انکے اہلخانہ کو ریپ، نازیبا میسجز کے علاوہ سوشل میڈیا سائٹس پر انہیں مختلف طریقوں سے حراساں کیا جارہا ہے۔