منشیات کے خلاف کریک ڈاؤن میں نائجیرین باشندے سمیت 15 ملزمان کو گرفتار کرلیا گیا۔
ترجمان اینٹی نارکوٹکس فورس ( اے این ایف ) کے مطابق مختلف کارروائیوں میں 9 کروڑ سے زائد مالیت کی 169.755 کلوگرام منشیات برآمد کی گئیں۔ جتیال گلگت میں کارروائی کے دوران گاڑی سے ایک کلوگرام چرس برآمد کر کے 2 ملزمان کو گرفتارکیا گیا۔ گنگال ایسٹ اسلام آباد کے قریب ملزم کے بیگ سے 12 کلوگرام چرس برآمد ہوئی۔
چاندنی چوک راولپنڈی کے قریب کوریئر آفس میں نیدرلینڈ بھیجے جانے والے پارسل سے 950 گرام آئس برآمد کی گئی جبکہ جی ٹی روڈ پر سیالکوٹ کے قریب گاڑی سے 19 کلوگرام آئس برآمد کرکے ملزم کو گرفتارکر لیا گیا۔
ترجمان کے مطابق سمندری موٹروے انٹرچینج کے قریب گاڑی سے 30 کلو چرس، 14.4 کلو افیون اور 10 کلوگرام آئس برآمد ہوئی۔ کارروائی میں 3 ملزمان گرفتارہوئے۔ فیصل آباد کے علاقے مریدوالا رجانہ میں 3 ملزمان کو گرفتارکرکے گاڑی سے 33.6 کلو چرس، 12 کلو افیون اور 10 کلو آئس برآمد کی گئی۔
لاہور انٹرنیشنل ایئرپورٹ پر نائیجرین باشندے سے 605 گرام کوکین برآمد ہوئی۔ ٹونمی موڑ ڈی جی خان کے قریب گاڑی سے 3 کلوگرام آئس برآمد کر کے 2 ملزمان کو گرفتارکیا گیا۔ فتح چوک حیدرآباد کے قریب ملزم سے 12 کلوگرام چرس برآمد ہوئی جبکہ ڈی آئی خان میں ملزم سے 200 گرام چرس برآمد کی گئی۔
گوادر کے غیر آباد علاقے میں لاوارث موٹرسائیکل سے 20 ہزار ایکسٹیسی گولیاں اور 600 گرام ویڈ برآمد ہوئی۔ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
