پاکستانی زرعی گریجویٹس کا پہلا بیچ چین میں تربیت مکمل کر کے واپس پہنچ گیا، جس پر وزیراعظم شہباز شریف نے مسرت کا اظہار کیا ہے۔
سماجی رابطوں کے پلیٹ فارم ایکس (سابقہ ٹوئٹر) پر اپنے بیان میں وزیراعظم شہباز شریف نے کہا ہے کہ پاکستانی زرعی گریجویٹس کا پہلا بیچ چین کے صوبہ شانشی میں کامیابی سے عملی تربیت مکمل کر چکا ہے، جو ایک خوش آئند پیشرفت ہے۔
شہباز شریف نے کہا کہ تقریباً 300 پاکستانی زرعی گریجویٹس نے پانی کی بچت پر مبنی آبپاشی، بیج کی پیداوار، مویشی پالنے، زرعی پیداوار میں اضافے اور فصلوں کی کٹائی کے بعد نقصانات کی روک تھام جیسے اہم شعبوں میں عملی تربیت حاصل کی ہے۔
انہوں نے چینی قیادت، شانشی حکومت اور تربیت فراہم کرنے والی دونوں جامعات کا خصوصی شکریہ ادا کیا اور اس اقدام کی کامیابی میں کردار ادا کرنے پر وزارتِ قومی غذائی تحفظ، ہائر ایجوکیشن کمیشن (HEC) اور پاکستانی سفارتخانے بیجنگ کی کوششوں کو سراہا۔
وزیراعظم کا کہنا تھا کہ یہ بیچ اُس 1000 پاکستانی زرعی گریجویٹس کی تربیتی اسکیم کا حصہ ہے جس کا اعلان انہوں نے جون 2024 میں اپنے دورۂ چین کے دوران کیا تھا۔ یہ پروگرام نہ صرف پاکستانی نوجوانوں کو جدید زرعی مہارتوں سے آراستہ کرے گا بلکہ ملکی زرعی پیداوار میں بہتری اور غذائی تحفظ کے اہداف کے حصول میں بھی مددگار ثابت ہوگا۔
