بالی ووڈ اداکارہ شردھا کپور اور معروف ڈانسر و اداکارہ نورا فتیحی کو 2022 کے منشیات کیس میں مکمل طور پر بری قرار دے دیا گیا ہے۔
ممبئی پولیس نے تحقیقات مکمل ہونے کے بعد واضح کیا ہے کہ دونوں شخصیات کے خلاف کوئی ٹھوس شواہد موجود نہیں۔
پولیس حکام کے مطابق تفصیلی چھان بین کے بعد یہ بات سامنے آئی ہے کہ شردھا کپور، نورا فتیحی اور دیگر نامزد افراد کا مبینہ منشیات نیٹ ورک سے کوئی تعلق ثابت نہیں ہو سکا۔ حکام کا کہنا ہے کہ کیس کے دوران کسی بھی سلیبریٹی کے ملوث ہونے کے شواہد نہیں ملے، جس کے بعد انہیں کلین چٹ دے دی گئی۔
یہ معاملہ اگست 2022 میں اس وقت سامنے آیا تھا جب ممبئی کرائم برانچ اور اینٹی نارکوٹکس سیل نے ایک مبینہ منشیات فروش سلیم سہیل شیخ کو گرفتار کیا تھا۔ کارروائی کے دوران اس کے قبضے سے تقریباً ایک لاکھ انیس ہزار بھارتی روپے مالیت کی میفیڈرون برآمد ہوئی تھی۔ ملزم نے دورانِ تفتیش دعویٰ کیا تھا کہ وہ مختلف تقریبات میں شریک شخصیات کو منشیات فراہم کرتا رہا ہے۔
بعد ازاں 2025 میں اس کیس کی تحقیقات کو مزید آگے بڑھاتے ہوئے اینٹی نارکوٹکس سیل نے متعدد افراد سے پوچھ گچھ کی، جن میں شوبز سے تعلق رکھنے والی کئی معروف شخصیات بھی شامل تھیں۔ تاہم تفتیش کے دوران کسی بھی فرد کے خلاف منشیات کے استعمال یا ترسیل کے حوالے سے کوئی قابلِ اعتبار ثبوت سامنے نہیں آ سکا۔
پولیس کے مطابق اس کیس میں ابتدائی چالان تین ملزمان کے خلاف پہلے ہی جمع کرایا جا چکا ہے، جبکہ مزید گرفتار افراد اور ایک مفرور ملزم کے خلاف ضمنی چالان جلد پیش کیا جائے گا۔
