سر کی خشکی ایک عام مسئلہ ہے جو نہ صرف بالوں کی خوبصورتی متاثر کرتی ہے بلکہ مسلسل خارش اور سفید فلیکس کی وجہ سے پریشانی کا باعث بھی بن سکتی ہے۔
بعض افراد میں خشکی سر تک محدود رہنے کے بجائے بھنوؤں، ناک کے اطراف اور چہرے کے دوسرے حصوں پر بھی ظاہر ہو سکتی ہے۔
خشکی سے نمٹنے کے لیے بالوں اور سر کی جلد کی مناسب دیکھ بھال کے ساتھ چند گھریلو طریقے بھی آزمائے جاتے ہیں۔
نیم کا استعمال
نیم کو طویل عرصے سے جلد اور بالوں کی دیکھ بھال کے لیے استعمال کیا جاتا رہا ہے۔ نیم کے پتوں کو پیس کر دہی میں ملا کر ماسک تیار کیا جا سکتا ہے، جسے تقریباً 20 منٹ سر کی جلد پر لگانے کے بعد دھو لیا جائے۔
نیم میں اینٹی فنگل خصوصیات پائی جاتی ہیں، اسی لیے نیم سے تیار کردہ تیل اور دیگر ہیئر کیئر مصنوعات بھی خشکی کے لیے استعمال کی جاتی ہیں۔
آملہ بھی ہو سکتا ہے مددگار
آملہ بالوں کی روایتی دیکھ بھال میں مقبول ہے۔ آملے کے پاؤڈر کو پانی کے ساتھ ملا کر پیسٹ بنایا جا سکتا ہے جبکہ اس میں تلسی کے پتے بھی شامل کیے جا سکتے ہیں۔
اس پیسٹ کو تقریباً 30 منٹ سر پر رکھنے کے بعد کسی معیاری شیمپو سے بال دھوئے جا سکتے ہیں۔
میتھی کے بیج
خشکی اور بالوں کی دیکھ بھال کے لیے میتھی بھی ایک مقبول گھریلو طریقہ ہے۔ میتھی کے بیجوں کو رات بھر پانی میں بھگو کر صبح پیس لیں اور تیار شدہ پیسٹ سر کی جلد پر لگائیں۔ تقریباً آدھے گھنٹے بعد بالوں کو اچھی طرح دھو لیں۔
مناسب شیمپو کا انتخاب
اگر خشکی بار بار واپس آرہی ہو تو صرف گھریلو نسخوں کے بجائے اینٹی ڈینڈرف شیمپو کا استعمال زیادہ مفید ثابت ہو سکتا ہے۔ بالوں کو باقاعدگی سے صاف رکھنے سے سر پر اضافی تیل، مردہ جلد اور فلیکس کے جمع ہونے کو کم کرنے میں مدد ملتی ہے۔
غذا کا بھی خیال رکھیں
بالوں اور جلد کی صحت کے لیے متوازن غذا اہم کردار ادا کرتی ہے۔ روزمرہ خوراک میں مناسب مقدار میں پروٹین، وٹامنز، منرلز اور صحت مند چکنائی شامل کرنا مجموعی صحت کے ساتھ بالوں کے لیے بھی فائدہ مند ہے۔
ڈاکٹر سے کب رجوع کریں؟
اگر خشکی بہت زیادہ ہو، سر میں شدید خارش یا سرخی پیدا ہوجائے، زخم بننے لگیں یا اینٹی ڈینڈرف شیمپو کے استعمال کے باوجود مسئلہ برقرار رہے تو ماہرِ امراضِ جلد سے مشورہ کرنا بہتر ہے۔
ایسی علامات بعض اوقات عام خشکی کے بجائے سیبوریک ڈرماٹائٹس، ایگزیما یا جلد کے کسی دوسرے مسئلے کی وجہ سے بھی ہو سکتی ہیں۔
