ویمنز فٹبال میں حاجرہ خان نے بلوچستان کو قومی چیمپئن بنا دیا

لاہور: قومی ویمنز فٹبال چیمپئن بلوچستان کی پلیئرز و آفیشلز کا ٹرافی کے ہمراہ گروپ فوٹو، فائنل میں واپڈا کو 0-7 سے شکست ہوئی، فاتح ٹیم کیلیے حاجرہ خان نے ہیٹ ٹرک کا کارنامہ انجام دیا۔ فوٹو : ایکسپریس

---

اسٹار فٹبالر حاجرہ خان نے بلوچستان کو قومی ویمنز فٹبال کا چیمپئن بنا دیا، واپڈا کیخلاف فائنل میں ہیٹ ٹرک کی بدولت ٹیم نے مقابلہ 7-0 سے اپنے نام کیا۔

فاتح سائیڈ کو 5 لاکھ ، رنرز اپ کو 3 اور برانز میڈلسٹ آرمی کو2 لاکھ روپے کا کیش انعام دیا گیا، حاجرہ ایونٹ کی ٹاپ اسکور قرار پائیں، بہترین گول کیپر کا اعزاز ان کی ساتھی کھلاڑی مہ پارہ نے حاصل کیا، ملائکہ نوربیسٹ کھلاڑی کے ایوارڈ کی حقدار ٹھہریں۔

تفصیلات کے مطابق پنجاب اسٹیڈیم لاہور میں منعقدہ فیصلہ کن معرکے میں بلوچستان نے واپڈا کو یکطرفہ مقابلے میں 7 گول سے شکست دیدی، غیرملکی لیگ کھیلنے والی پہلی قومی کھلاڑی حاجرہ خان نے چوتھے منٹ میں گول داغتے ہوئے کھاتہ کھولا، 24 ویں منٹ میں انھیں گیند جال میں پہنچانے کا ایک اور موقع ملا جسے کار آمد بناتے ہوئے ٹیم کی برتری کو دوگنا کردیا، حاجرہ نے پہلا ہاف ختم ہونے سے5 منٹ قبل انفرادی کوشش سے ایک اور گول داغتے ہوئے ہیٹ ٹرک مکمل کرلی۔ وقفے کے بعد بھی بلوچستان کی ٹیم مکمل طورپر حاوی نظر آئی، 54 ویں منٹ میں شاہلائیلہ نے گیندکو جال میں پھینک کر مقابلہ 4-0 کردیا، صرف 4 منٹ بعد جویانا نے بھی حریف ٹیم پر ہاتھ صاف کرلیا۔

60 ویں منٹ میں نادیہ کو موقع ملا تو انھوں نے بھی واپڈا پر ترس نہ کھایا،آخری لمحات میں جویانا نے ایک اور گول کرتے ہوئے مقابلہ 7-0 کردیا، میچ میں کسی بھی لمحے پر واپڈا کے فارورڈز نے حریف گول کیپر کو مشکل میں نہیں ڈالا، بلوچستان کی ٹیم پہلی بار قومی چیمپئن بنی، اس سے قبل ینگ رائزنگ اسٹارز کلب نے 4 بار ٹائٹل اپنے نام کیا تھا، واپڈا اور اسپورٹس سائنسز 2,2 بار فاتح رہیں، پنجاب نے ایک بار ٹرافی پائی۔ اختتامی تقریب کے مہمان خصوصی سیکریٹری پاکستان فٹبال فیڈریشن احمد یار خان لودھی نے فاتح ٹیم کو ٹرافی، میڈلز اور 5 لاکھ کی انعامی رقم دی، سینیٹر روبینہ نے رنرز اپ واپڈا کو 3 لاکھ، طارق لطفی اور قومی فٹبال ٹیم کے کپتان کلیم اللہ خان نے تیسری پوزیشن حاصل کرنے والی آرمی ٹیم کو میڈلز، ٹرافی اور 2 لاکھ روپے کیشن انعام دیا۔

فیئر پلے پر آرمی کی ٹیم ایک لاکھ روپے کی حقدار ٹھہری، ٹورنامنٹ میں 30 گول کرنے والی بلوچستان کی حاجرہ خان ٹاپ اسکورر قرار پائیں، ان کی ساتھی مہ پارہ کو ایونٹ کی بہترین گول کیپر قراردیا گیا، ان تمام کھلاڑیوں کو پی ایف ایف کی جانب سے ایک، ایک لاکھ روپے بھی ملے۔ پاکستان آکر کھیلنے والی پہلی انٹرنیشنل پلیئرعریشہ رضا کو حوصلہ افزائی کے لیے ایوارڈ سے نوازا گیا۔ اختتامی تقریب میں پی ایف ایف کے ڈائریکٹر گیم ڈیولپمنٹ پرویز سعید میر، ایڈمن میجر(ر) جہانگیر خان لودھی، سیکریٹری پنجاب فٹبال ایسوسی ایشن خالد محمود اور سید فراست علی شاہ بھی موجود تھے۔