پاکستانی طالب علم نے 37 سالہ قبل حادثے کا شکار ہوکر لاپتہ ہونے والے پی آئی اے کی پرواز پی کے 404 کا ملبہ تلاش کرنے کا دعویٰ کیا ہے۔
ایکسپریس نیوز کے مطابق طالب علم صبیح راجپوت نے طویل تحقیق اور گوگل سمیت جدید ٹیکنالوجی کی مدد سے لاپتہ طیارے کا ممکنہ سراغ لگایا جس کے مطابق طیارے کا ملبہ تاجکستان میں ہے۔
نوجوان کے مطابق گوگل ارتھ کی مدد سے 37 سال پرانے فضائی معمے کا ممکنہ سراغ مل گیا ہے اور پی آئی اے کی گلگت سے اسلام آباد جانے والی پی آئی اے کی پرواز پی کے 404 کا ملبہ تاجکستان میں ہونے کا امکان ہے۔
نوجوان صبیح علی راجپوت کے مطابق لاپتہ فوکر طیارے کا ملبہ واخان کے قریب ایک پہاڑ کی چوٹی پر موجود ہے، گوگل ارتھ اور سیٹلائٹ تصاویر کی مدد سے لاپتہ طیارے کے ممکنہ مقام کا تعین کرلیا۔
صبیح علی راجپوت نے کہا کہ 37 سال پرانے فضائی معمہ کو جدید ٹیکنالوجی کی مدد سے حل کرنے کی کوشش کی، پہلے مرحلے میں طیارے کے فیول ٹینکس میں موجود ایندھن کو مدنظر رکھتے ہوئے تحقیقی عمل شروع کیا۔
انہوں نے بتایا کہ گوگل ارتھ پر طویل تحقیق کے بعد آبادی سے دور دشوار گزار پہاڑی مقام پر ممکنہ ملبے کی نشاندہی پی کے 404 کے ملبے کی نشاندہی کا دعویٰ درست ثابت ہوا تو 37 سال پرانا راز کھل سکتا ہے، طیارے نےممکنہ طور پر خراب موسم کے باعث گلگت واپسی کی کوشش کی، تاجکستان کیسے چلا گیا یہ ماہر ہوابازی ہی بتاسکتے ہیں۔
اس پر ماہر ہوا باز عمران اسلم خان نے کہا کہ صبیح راجپوت کی تحقیق اور نشاندہی کی جدید ٹیکنالوجی کے ذریعے جانچ ممکن ہے، حکومت ہیلی کاپٹرز اور کوہ پیماؤں کی مدد سے ممکنہ مقام پر سرچ آپریشن کرسکتی ہے۔
انہوں نے کہا کہ طیارے کا ملبہ اور بلیک باکس ملنے سے 37 سال پرانے فضائی حادثے کی حقیقت سامنے آسکتی ہے۔ عمران اسلم کے مطابق گلگت سے اسلام آباد کے فضائی راستے پر موسم انتہائی تیزی سے تبدیل ہوتا ہے، جبکہ پہاڑی علاقوں میں پہاڑ کے لیول 30 تا 50 ہزار فٹ پر موسمی تبدیلی طیاروں کے لیے انتہائی خطرناک صورتحال پیدا کرسکتی ہے۔
انہوں نے کہا کہ طیارے کے ایندھن ختم ہونے کا تاثرٹھیک نہیں ہے البتہ تیکنیکی خرابی اور پہاڑ سے ٹکرانے کے امکانات ہوسکتے ہیں، اس دور کے طیاروں میں جدید موسمی ریڈارز کی سہولت موجود نہیں تھی۔
انہوں نے کہا کہ بلیک باکس کی بازیابی سے حادثے کی وجوہات جاننے میں مدد مل سکتی ہے جبکہ پی کے 404 کے حادثے کی تحقیقات مستقبل میں ایسے فضائی حادثات سے بچاؤ میں معاون ثابت ہوسکتی ہیں۔
واضح رہے کہ پی آئی اے کی پرواز پی کے 404نے 25 اگست کی الصبح گلگت سے اسلام آباد کے اڑان بھری تھی جس کے بعد فوکر 27 ساختہ طیارہ اپنی منزل پر پہنچنے کے بجائے برف پوش پہاڑوں میں پراسرارطور پرلاپتہ ہوگیا تھا۔ پروازمیں سوار 54 مسافروں میں2غیرملکی بھی سوارتھے۔
اس دورمیں خراب موسم کے باوجود پاکستان ائیرفورس نےجہازوں کے ذریعے کئی روز تک سرچ آپریشن کیا تھا، حادثے کے کئی عرصے کے بعد بھی کوہ پیماوں کے ذریعے برف پوش چوٹیوں اور پہاڑوں پر سرچ آپریشن کیا گیا۔
