دورۂ زمبابوے  کے لئے انتخا ب عالم کا بطورمنیجر پھر ’’انتخاب‘‘

انتخاب عالم جمعرات کو قومی ٹیم کے ہمراہ ہرارے جائیؓں گے، فوٹو: فائل

---

انتخاب عالم کو ایک بار پھر پاکستان کرکٹ ٹیم کا منیجر بنادیا گیا ،وہ جمعرات 24 ستمبر کوٹیم کے ہمراہ زمبابوے جائیں گے، باقاعدہ اعلان جلد متوقع ہے، سابق ٹیسٹ کرکٹر کے مطابق ابھی تک منیجر کے عہدے کا نوٹیفکیشن موصول نہیں ہوا تاہم ان کا کہنا تھا کہ قومی ٹیم کا منیجر بننا میرے لیے اعزاز کی بات ہوگی، منیجر کے طور پر نظم وضبط پر عمل کرانا بڑی ذمہ داری ہوتی ہے، زمبابوے کی ٹیم ہوم گراؤنڈ پر آسان حریف نہیں ہوگی۔

تفصیلات کے مطابق نوید اکرم چیمہ کے انکار نے انتخاب عالم کی قسمت ایک بار پھر چمکادی، ڈائریکٹر ڈومیسٹک کرکٹ کے اہم عہدے سے ہاتھ دھونے کے بعد سابق ٹیسٹ کرکٹر کو قومی ٹیم کا عارضی منیجر بنانے کا فیصلہ ہو گیا ہے، اعلان جلد ہوگا، یاد رہے کہ حکومت نے نوید اکرم چیمہ کوچیئرمین فیڈرل پبلک سروس کمیشن مقرر کیا ہے۔

جس کے بعد انہوں نے پی سی بی کے سربراہ شہریار خان سے ملاقات میں قومی ٹیم کے منیجر کی ذمے داری مزید نبھانے سے انکارکردیا تھا جس کے بعد قرعہ انتخاب عالم کے نام نکلا ہے، پی سی بی نے گذشتہ اخراجات میں کمی کیلئے رائٹ سائزنگ کا عمل شروع کرتے ہوئے ڈائریکٹر ڈومیسٹک اور ڈائریکٹر انٹرنیشنل کے عہدوں کو ختم کردیا تھا اور ان عہدوں پر بالترتیب مامور انتخاب عالم اورذاکر خان کوبھی عہدوں سے فارغ کردیا گیا تھا لیکن اس اعلان کے چند دن بعد ہی 73سالہ انتخاب عالم کوایک اور ذمے داری سونپتے ہوئے قومی ٹیم کے منیجر کے عہدے پر فائز کردیا گیا ہے۔

ذرائع کے مطابق انتخاب عالم کو یہ ذمہ داری فی الحال صرف دورئہ زمبابوے کے لیے سونپی گئی ہے اور یواے ای میں انگلینڈ سے سیریز کیلیے منیجر کا اعلان بعد میں کیا جائیگا۔ادھر انتخاب عالم کا کہنا ہے کہ ابھی تک منیجر کے عہدے کا نوٹیفکیشن موصول نہیں ہوا، قومی ٹیم کا منیجر بننا میرے لیے اعزاز کی بات ہے۔

منیجر کے طور پر نظم وضبط پر عمل کرانا بڑی ذمہ داری ہوتی ہے۔ وہ گذشتہ روز پاکستان اور زمبابوے کے دوران لوگو کی رونمائی کی تقریب کے موقع پر مہمان خصوصی کی حیثیت سے میڈیا سے بات چیت کر رہے تھے۔ انھوں نے کہا کہ دورئہ سری لنکا کے دوران کھلاڑیوں نے مثبت کرکٹ کھیلی، اسپانسرز کے بغیرسب کچھ ہو جانا بہت مشکل تھا، انتخاب عالم نے کہا کہ ملک میں انٹرنیشنل کرکٹ کی بحالی کیلیے زمبابوے کی ٹیم پاکستان آئی تھی، جواب میں ہم بھی زمبابوے جا رہے ہیں، وہاں کی کنڈیشنز ہماری کنڈیشنز سے تھوڑی سے مختلف ہیں اور قدرتی طور پر جب ہم کسی دوسرے ملک جا کرکھیلتے ہیں تومیزبان ٹیم کو ہوم گراؤنڈ کا تھوڑا سا ایڈواٹیج ضرورہوتا ہے، زمبابوے ٹیم اپنے ہوم گراؤنڈ میں بہت اچھی ٹیم ہے۔

اس لیے یہ دورہ ہماری ٹیم کے لیے چیلنج ہوگا تاہم سابق قومی کپتان نے امید ظاہر کی کہ جس طرح پاکستانی ٹیم سری لنکا میں کھیل کر آئی ہے،کھلاڑی اسی ردھم میںکھیلیں تو کامیابی ملے گا۔ انتخاب عالم نے کہا کہ دورئہ زمبابوے کا بہت زیادہ فائدہ یو اے ای میں شیڈول انگلینڈ سیریز میں قومی کھلاڑیوں کو ہوگا۔

قومی ٹیم کے منیجر بنائے جانے کے حوالے سے انھوں نے کہا کہ ابھی تک کوئی نوٹیفکیشن نہیں ملا ہے لیکن یہ ضرور کہوں گا کہ ڈسپلن پر آپ کسی بھی صورت میں سمجھوتہ نہیں کر سکتے، سب سے اہم بات نظم وضبط کا مظاہرہ کرنا ہوتا ہے۔

انتخاب عالم نے مزید کہا کہ قومی ٹیم کا منیجر بنتا ہوں تو یہ میرے لیے باعث اعزاز ہوگا، نئی ذمہ داری ملنے پر زمبابوے جانا اس لیے بھی مشکل نہیں ہوگا کیونکہ ایئرپورٹ پر ہی ویزا مل جاتا ہے، انتخاب عالم نے کہا کہ میں ٹیم منیجر کی بجائے پی سی بی کا ملازم ہونے کی حیثیت سے پریس کانفرنس کر رہا ہوں۔