شہباز شریف کا دورہ شمالی وزیرستان پاک فوج کے جوانوں سے ملاقات

شہبازشریف نے 7 ڈویژن ہیڈ کوارٹراورپاک افغان سرحد کا دورہ کیا، فوٹو: اسکرین گریب

---

وزیراعلیٰ پنجاب محمد شہباز شریف نے پاک فوج کے افسروں اور جوانوں سے اظہار یکجہتی کے لیے شمالی وزیرستان کے علاقے میرانشاہ کا دورہ کیا۔

ایکسپریس نیوز کے مطابق وزیر اعلیٰ پنجاب میاں شہباز شریف شمالی وزیرستان پہنچے اور پاک فوج کے افسران و جوانوں سے ملاقات کی۔ شہباز شریف نے 7 ڈویژن ہیڈ کوارٹر اور پاک افغان سرحد کا دورہ کیا جہاں جنرل آفیسر کمانڈنگ 7 ڈویژن، میجر جنرل اظہر عباسی نے انہیں بریفنگ دی۔ شہباز شریف نے 7 ڈویژن ہیڈ کوارٹر میں شہداء کی یادگار پر پھولوں کی چادر چڑھائی اور شہداء کے ایصال ثواب کے لیے فاتحہ خوانی کی۔

شمالی وزیرستان دورے کے موقع پر وزیر اعلیٰ پنجاب پاک افغان سرحد کے علاقے کیٹون بھی پہنچے جہاں وزیراعلیٰ کو پاک افغان سرحد کی مینجمنٹ اور باڑ لگانے کے حوالے سے بریفنگ دی گئی جب کہ شہباز شریف نے یونس خان اسپورٹس کمپلیکس کا بھی دورہ کیا۔

اس موقع پر وزیر اعلیٰ پنجاب کا کہنا تھا کہ پاک افغان سرحد پر باڑ لگانے سے دہشت گردی کے واقعات میں کمی آئی ہے، باڑ لگانے کے لیے پنجاب حکومت نے پہلے بھی تعاون کیا آئندہ بھی کرے گی۔

شہباز شریف کا کہنا تھا کہ دہشت گردی کے خلاف جنگ میں بے مثال کامیابیوں کی تاریخ بہادر سپوتوں نے اپنے قیمتی لہو سے لکھی ہے، پاک فوج کے افسروں اور جوانوں کی عظیم قربانیوں کی اقوام عالم میں کوئی دوسری مثال موجود نہیں جو تاریخی کارنامہ آپ نے پاکستان کے لیے سرانجام دیا ہے قوم کبھی فراموش نہیں کرسکے گی، پاک دھرتی سے دہشت گردی کے ناسور کے خاتمے کے لیے پاک فوج کا کردار سنہری حروف سے لکھا جائے گا۔