حکومت میں شامل افراد اپنی نااہلی اورجھوٹ سے تباہی لارہے ہیں مریم اورنگزیب

فرخ سلیم نے معیشت پر سوالات اٹھائے تو ان کے نوٹی فکیشن پر یوٹرن لے لیا گیا، ترجمان ن لیگ

---

مسلم لیگ (ن) کی ترجمان مریم اورنگزیب کا کہنا ہے کہ حکومت میں شامل افراد اپنی نااہلی اورجھوٹ سے تباہی لارہے ہیں۔

ایکسپریس نیوز کے مطابق ایک بیان میں ترجمان (ن) لیگ مریم اورنگزیب کا کہنا تھا کہ وہ جاننا چاہتی ہیں کہ عمران خان کا بطور وزیراعظم نوٹی فکیشن جاری ہوا کہ نہیں؟، عمران خان کا بطور وزیراعظم، وزرا اور مشیروں کے نوٹی فکیشنز عوام کے سامنے لائے جائیں۔

مریم اورنگزیب کا کہنا تھا کہ حکومت اعلانیہ اور غیراعلانیہ اپنے تمام مشیروں کو سامنے لائے، قوم کو بتایاجائے کابینہ اجلاسوں میں بغیر نوٹی فکیشن کتنے لوگ شریک ہورہے ہیں؟ یہ جھوٹوں کا ٹولہ کل کہیں گے کہ کابینہ کے تمام فیصلے ہی کالعدم ہیں کیونکہ ہمارا تونوٹی فکیشن ہی نہیں ہوا تھا، نوٹی فکیشن کے بغیر کابینہ اجلاسوں میں شرکت کرنے اور کرانے والوں کے خلاف ایف آئی آر درج کرائی جائے۔

ترجمان(ن)لیگ نے کہا کہ مہنگائی و بیروزگاری میں اضافہ کرنے اور معیشت کا کباڑہ کرنے والے یہ لوگ کل کہہ دیں گے کہ ہمارا تو نوٹی فکیشن ہی نہیں ہوا تھا اس لئے ہم اس تباہی کے ذمہ دار نہیں، اور یہ بھی خدشہ ہے کہ ڈاکٹرفرخ سلیم کے معاملے میں جھوٹ بولنے والے بھاگ جائیں گے اور کہیں گے ہمارا تو نوٹی فکیشن ہی نہیں ہوا تھا، جس طرح ملک میں یہ لوگ اپنی نااہلی اور جھوٹ سے تباہی لا رہے ہیں ضروری ہے کہ کہ ان کے نوٹی فکیشنز قوم کے سامنے آئیں۔