خرم دستگیر کے والد کیخلاف سرکاری زمین پر قبضہ کرکے سینما بنانے پر مقدمہ درج

دستگیر برادرز نے متعلقہ محکموں کے افسران کی ملی بھگت سے غیر قانونی طور پر گلستان سینما تعمیر کیا۔، ریفرنس فوٹوفائل

---

(ن) لیگی سینئر رہنما اور سابق وفاقی وزیر خرم دستگیر کے والد غلام دستگیر پر سرکاری زمین پر قبضہ کرکے گلستان سینما بنانے پر اینٹی کرپشن میں مقدمہ درج کرلیاگیا ہے۔

ایم او پلاننگ طاہر گجر ، اور سابق بلڈنگ انسپکٹر سرفراز احمد بھی غلام دستگیر کی معاونت پر مقدمہ میں نامزد ہیں۔ ملزمان کے خلاف مقدمہ ڈی سی گجرانوالہ کے ریفرنس پر درج کیا گیا۔

ڈپٹی کمشنر گجرانوالہ لیفٹینٹ (ر) سہیل اشرف نے ڈی جی اینٹی کرپشن پنجاب کو ملزمان کے خلاف قیمتی سرکاری زمین پر ناجائز قبضہ کرکے غیر قانونی سینما بنا کر سرکاری خزانے کو کروڑوں روپے کا نقصان پہنچانے پر مقدمہ درج کرنے کی استدعا کی تھی۔

ریفرنس میں کہا گیا ہے کہ دستگیر برادرز نے متعلقہ محکموں کے افسران کی ملی بھگت سے شہر کی پرائم لوکیشن پر قبضہ کر کے غیر قانونی طور پر گلستان سینما تعمیر کیا۔

ڈپٹی کمشنر گجرانوالہ نے کہا کہ ملزمان تحصیل کونسل صدر گجرانوالہ اور صوبائی حکومت کی 1 کنال 10 مرلہ زمین پر 1967 سے قابض تھے، انہوں نے متعلقہ محکموں کی اجازت کے بغیر قیمتی سرکاری زمین پر قبضہ کرکے گلستان سینما بنایا، ان سے سرکاری زمین واگزار کرا لی گئی ہے اور اب پینل رینٹ کی مد میں 1 کروڑ 71 لاکھ سے زائد تاوان وصول کیا جائے گا۔

اینٹی کرپشن حکام کے مطابق پنجاب بھر میں قبضہ مافیا کے خلاف کریک ڈاؤن جاری رہے گا اور سرکاری خزانے کی ایک ایک پائی وصول کی جائے گی۔