معلومات کے 10 ہزار نقاط والا اے آر اسمارٹ گلوب

اے آر اسمارٹ گلوب 11 مختلف شعبوں میں معلومات فراہم کرتا ہے۔ فوٹو: ویوبا لیب

---

بالخصوص بچوں کو تاریخ، جغرافیہ اور دیگر علوم سکھانے والا ایک دلچسپ کرہ ارض ماڈل (گلوب) بنایا گیا ہے جس پر برقی پین رکھتے ہیں وہاں کی تاریخ اور ان گنت معلومات سامنے آجاتی ہے۔ اس طرح پورے گلوب پر کوئی 10 ہزار مقامات ایسے ہیں جہاں سے مختلف شعبوں کی معلومات حاصل کی جاسکتی ہیں۔

تمام ڈیٹا کو آسان انداز میں ایپ کی بدولت فون، ٹیبلٹ یا کمپیوٹر پر دیکھا جاسکتا ہے۔ اس طرح بچے بہت دیر تک اس سے معلومات حاصل کرسکتے ہیں اور اپنی معلومات بڑھا سکتےہیں۔ فی الحال کراؤڈ فنڈنگ ویب سائٹ پر اس کا چندہ جاری ہے اور تعارفی قیمت 69 ڈالر رکھی گئی ہے۔ اسمارٹ گلوب میں خصوصی اے آر ٹیکنالوجی استعمال کی گئی ہے جس کے تحت 11 تھیمز یا شعبوں، 220 ممالک اور اقوام کے علاوہ پہاڑوں، سمندروں اور جغرافیائی حصوں کے متعلق معلومات حاصل کی جاسکتی ہیں۔

اے آر اسمارٹ گلوب 720 درجے پر گھومتا ہے اور آواز سے بھی آپ کو کسی اہم مقام کے بارے میں آگاہ کرتا ہے۔ اس طرح دفاتر، اداروں، اسکولوں اور گھروں کے لیے یکساں مفید ہے۔ بس ایک پین کسی بھی جگہ رکھئے اور وہاں کے ملک، آبادی، دارالحکومت، جغرافیہ، کرنسی، قومی دن، تاریخ، وسائل، وجہ شہرت اور دریاؤں کے ساتھ ساتھ طبعی جغرافیہ کا احوال بھی معلوم کیا جاسکتا ہے۔



دوسری جانب اس میں دلچسپ گیم بھی ہیں جنہیں کھیل کر آپ بہت کچھ جان سکتے ہیں۔ لیکن یہ معلومات یہاں ختم نہیں ہوتی بلکہ ستاروں، کہکشاؤں، فلکیاتی اجسام، اور ان کے بارے میں دلچسپ معلومات بھی حاصل کی جاسکتی ہیں۔ اس کے علاوہ خود ہمارے کرہ ارض، اس کی تاریخ، طبعی خدوخال، سمندر، دریا، پہاڑ اور جنگلی حیات بھی ایک کلک کی دوری پر ہیں۔

ایپ کی بدولت آپ ساری معلومات نہ صرف دیکھ سکتے ہیں بلکہ اسے محفوظ بھی کرسکتےہیں۔ اس طرح عملی طور پر یہ سافٹ ویئر اور ہارڈویئر کا ایک دلچسپ مجموعہ ہے۔