اسرائیلی فوج نے دعویٰ کیا ہے کہ شمالی غزہ میں کیے گئے دو الگ الگ فضائی حملوں میں حماس کے چار کمانڈرز ارکان کو نشانہ بنایا ہے جن میں تنظیم کے بھرتی شعبے کے سربراہ اور دو اہم عسکری کمانڈر بھی شامل ہیں۔
اسرائیلی فوج کے بیان میں کہا گیا ہے کہ پہلے حملے میں حماس کے بھرتی کے شعبے کے سربراہ نبیل حمد اور حماس کے کمانڈر مہند نادر محمود دحدوح کو نشانہ بنایا گیا۔
بیان میں مزید کہا گیا کہ اسی روز دو دیگر کارروائیوں میں حماس کے نخبا فورس سے تعلق رکھنے والے ایال نائف فہمی مسالمہ اور تنظیم کے راکٹ یونٹ کے کمانڈر عرفات کمال محمد ارعیر کو نشانہ بنایا گیا۔
ترجمان اسرائیلی فوج نے ان افراد کو نشانہ بنانے کی وجوہات اور حملوں کے مقام سے متعلق مزید تفصیلات جاری نہیں کیں۔ تاحال حماس کی جانب سے اسرائیلی فوج کے ان تازہ دعوؤں پر کوئی ردعمل سامنے نہیں آیا۔
واضح رہے کہ غزہ میں جنگ بندی کے باوجود اسرائیلی فوج کی کارروائیاں جاری ہیں۔اسرائیل کا مؤقف ہے کہ اس کے حملوں میں حماس کے عسکری ارکان اور کمانڈروں کو نشانہ بنایا جاتا ہے۔
