بھارت میں بارش اور طوفان سے 86 سے زائد افراد ہلاک 136 زخمی

سب سے زیادہ ہلاکتیں اتر پردیش میں ہوئیں جہاں کم از کم 51 افراد کی ہلاکت اور 28 کے زخمی ہونے کی تصدیق ہوئی ہے

ویب ڈیسک May 14, 2018

رواں ماہ بھارت میں مٹی کے طوفان اور آسمانی بجلی گرنے کے واقعات میں 175 افراد ہلاک اور 400 سے زائد زخمی ہوئے ہیں فوٹو: فائل

بھارت کی مختلف ریاستوں میں مٹی کے طوفان اور بارش سے کم از کم 86 افراد ہلاک جب کہ 136 زخمی ہوگئے ہیں۔

بھارتی میڈیا کے مطابق بھارت میں ایک بار پھر مٹی کے طوفان اور تیز بارش نے تباہی مچا دی ہے۔ دہلی، اتر پردیش کے 25 اضلاع، مغربی بنگال اور آندھرا پردیش میں 70 کلومیٹر کی رفتار سے چلنے والے مٹی کے طوفان نے معمولات زندگی معطل کردی ہے۔ آسمانی بجلی گرنے اور مختلف واقعات میں 86 سے زائد افراد لقمہ اجل بن گئے ہیں جب کے 136 زخمی ہوئے۔

سرکاری اعداد وشمار کے مطابق سب سے زیادہ ہلاکتیں اتر پردیش میں ہوئیں جہاں کم از کم 51 افراد کی ہلاکت اور 28 کے زخمی ہونے کی تصدیق ہوئی ہے جب کہ بنگال میں 12 افراد ہلاک ہوئے ہیں۔ طوفان، باد وباراں اور بارشوں کے باعث بھاری مالی نقصان بھی ہوا ہے سیکڑوں مکانات ڈھے گئے ہیں۔ درخت اور بجلی کے کھمبے اکھڑ گئے جس کے باعث ہلاکتوں میں اضافہ ہوا جب کے ایک لاکھ سے زائد افراد کھڑی فصلوں اور مویشیوں سے محروم ہو گئے ہیں۔

یہ خبر بھی پڑھیں : 36 ہزار سے زائد بار آسمانی بجلی گرنے کے واقعات

واضح رہے کہ گزشتہ ہفتے بھی اترپردیش کے شہر آگرہ اور راجستھان کے تین اضلاع الور، بھرت پور اور دھول پور میں طوفانی بارشوں اور 130 کلومیٹر فی گھنٹہ کی رفتار سے چلنے والی ہواؤں کے نتیجے میں 125 افراد ہلاک اور 300 سے زائد زخمی ہوگئے تھے۔