ڈونلڈ ٹرمپ کا شمالی کوریا کے سربراہ سے ملاقات کی بحالی کا عندیہ

 واشنگٹن: امریکی صدر ڈونلڈ ٹرمپ نے کہا ہے کہ شمالی کوریا کے ساتھ مثبت بات چیت جارہی ہے جو کامیاب رہی تو طے شدہ ملاقات 12 جون کو ہی ہو سکتی ہے۔

امریکی صدر ڈونلڈ ٹرمپ نے ایک بار پھر شمالی کوریا کے سربراہ کے ساتھ ملاقات کا عندیہ دے دیا ہے۔ اس سے قبل امریکی صدر نے شمالی کوریا کے سربراہ کے ساتھ ہونے والی ملاقات کو منسوخ کرنے کا اعلان کر دیا تھا۔ امریکی صدر اور شمالی کوریا کے سربراہ کے درمیان سنگاپور میں 12 جون کو ملاقات طے تھی۔

We are having very productive talks with North Korea about reinstating the Summit which, if it does happen, will likely remain in Singapore on the same date, June 12th., and, if necessary, will be extended beyond that date.

— Donald J. Trump (@realDonaldTrump) May 26, 2018

امریکی صدر ڈونلڈ ٹرمپ نے اپنی ایک ٹویٹ میں کہا ہے کہ شمالی کوریا کے ساتھ ملاقات میں آنے والے تعطل کے خاتمے کے لیے مثبت اور تعمیری بات چیت جا ری ہے۔ اگر یہ گفت و شنید کامیاب رہی تو عین ممکن ہے کہ شمالی کوریا کے سربراہ سے ہونے والی ملاقات پہلے سے طے شدہ تاریخ 12 جون کو ہی ہوجائے گی تاہم اگر ضروری ہوا تو اس تاریخ کو آگے بھی بڑھایا جا سکتا ہے۔

واضح رہے امریکا اور شمالی کوریا کے سربراہان کے درمیان ہونے والی ملاقات 12 جون کو طے تھی لیکن گزشتہ ہفتے امریکی صدر نے شمالی کوریا کی جانب سے شرائط پر عمل نہ کرنے کے باعث ملاقات کی منسوخی کا اعلان کیا تھا۔ جس پر شمالی کوریا نے ملاقات کو جاری رکھنے کے عزم کا اعادہ کیا تھا۔