پی ایف ایف انتخابات؛ فیصل حیات کو شکست دینے کیلیے عامرڈوگر اور ظاہر شاہ میں اتحاد

میاں اصغر سلیمی  بدھ 28 نومبر 2018
دونوں عہدیداروں کے درمیان ایک معاہدہ طے پایا ہے۔

دونوں عہدیداروں کے درمیان ایک معاہدہ طے پایا ہے۔

پی ایف ایف انتخابات میں فیصل حیات کو شکست دینے کے لئے عامرڈوگر اور ظاہر شاہ نے اتحاد کرلیا۔

پاکستان فٹبال فیڈریشن کے انتخابات میں نیا موڑ آگیا ،انتخابات میں حصہ لینے والے دواہم گروپس ملک عامر ڈوگر اور سید ظاہر علی شاہ نے آپس میں الائنس کر لیا، دونوں عہدیداروں کے درمیان ایک معاہدہ طے پایا ہے جس میں دونوں دھڑوں نے ملکر 14 سال سے پی ایف ایف پر قابض فیصل صالح حیات کے خلاف الیکشن لڑنے کا فیصلہ کیا ہے۔ اس حوالے سے معاملات ملک عامر ڈوگر ایم این اے اور سید ظاہر علی شاہ کے درمیان اسلام آباد میں ہونے والی ملاقات میں طے پا گئے جس میں پنجاب فٹبال ایسوسی ایشن کے صدر سردارنوید حیدر خان بھی موجود تھے۔

ذرائع کے مطابق کر جلد ہی ایک اور میٹنگ کا اہتمام بھی کیا جائے گا جس میں الیکشن میں سیٹ ایڈجسٹمنٹ کے حوالے سے بات چیت کی جائے گی ۔الیکشن میں اگر ایک گروپ کا صدر ہوگا تو دوسرے گروپ سے  سینئر نائب صدر لیا جائے گا۔ پی ایف ایف کے حوالے سے تازہ ترین ملاقات کے بعد آئندہ ہونے والے انتخابات میں  ڈیپارٹمنٹس کے 9 ووٹ ,کے پی کے کے 3 ووٹ,پنجاب کے 3 ووٹ اور ممکنہ طور پر اسلام آباد، بلوچستان اور ریفری کمیشن کے ووٹ بھی اب ملک عامر ڈوگر کو جاتے نظر آرہے ہیں۔

مزید معلوم ہوا ہے کہ پنجاب فٹبال ایسوسی ایشن کے صدر سردار نوید حیدر خان نے ایسوسی ایشن کے آٹھ ارکان کو شوکازنوٹس جاری کرنے کا فیصلہ کیا ہے۔نوٹس میں موقف اختیار کیا جائے گا کہ ان ارکان کی غیر قانونی اور غیر آئینی میٹنگ تھی اور ان ارکان نے ریٹرننگ افسر پر جانبداری کا الزام لگا کر الیکشن پر اثرانداز ہونے کی کوشش کی۔ ہے،  شوکاز نوٹس کی ایک کاپی سپریم کورٹ آف پاکستان کو بھی بھجوائی جائے گی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔