نواز شریف نے جیل میں قرآن مجید دینی اور ادبی کتب منگوالیں

سابق وزیراعظم کا جیل میں طبی معائنہ، بلڈ پریشر نارمل قرار فوٹو:فائل

---

کوٹ لکھپت جیل میں ڈاکٹرز کی خصوصی ٹیم نے سابق وزیراعظم نواز شریف کا طبی معائنہ کیا اور ان کی طبیعت کو بہتر قرار دیا۔

لاہور کی کوٹ لکھپت جیل میں سروسزاسپتال کے ڈاکٹرزکی خصوصی ٹیم نے 45 منٹ تک سابق وزیراعظم کا طبی معائنہ کیا۔ ڈاکٹرز کی ٹیم نے ان کی صحت کی تفصیلات پوچھیں اور بلڈ پریشر نارمل قرارد یا۔

سابق وزیراعظم کو رات گئے گھر سے آنے والی ادویات پہنچائی گئیں، انہوں نے نیلے رنگ کی شلوارقمیض پہن رکھی ہے اور صبح سویرے اخبارات کا مطالعہ بھی کیا، جیل سپرٹنڈنٹ اورڈپٹی سپرنٹنڈنٹ نے دورے کے دوران نوازشریف سے ملاقات کی۔

جیل حکام کی جانب سے نواز شریف سے ملاقات کا دن جمعرات مقررکیا گیا ہے، دوست احباب اورپارٹی رہنماؤں سے ملاقات کی لسٹ پہلے نوازشریف کوبھجوائی جائے گی، انہیں جن سے ملنا ہوگا انکے نام سے پہلے آگاہ کریں گے۔ میاں نواز شریف کو جیل میں 4470 قیدی نمبر دیا گیا ہے، نوازشریف جب تک جیل میں رہیں گے ان کی شناخت یہ نمبرہوگا۔

واضح رہے کہ سابق وزیراعظم نوازشریف کو العزیزیہ ریفرنس میں 7 سال قید کی سزا ہوئی ہے۔