بھارتی سفارتی عملے کو ہراساں کرنے کے الزامات بے بنیاد ہیں پاکستان

ہمارا سارا زور اس پر ہے کہ مسئلہ کشمیر کا حل نکالا جائے، ترجمان دفتر خارجہ فوٹو:فائل

---

پاکستان نے بھارتی سفارتی عملے کو ہراساں کرنے کے الزامات مسترد کردیے۔

ترجمان دفتر خارجہ ڈاکٹر محمد فیصل نے ہفتہ وار بریفنگ دیتے ہوئے کہا کہ اسلام آباد میں بھارتی سفارتی عملے کو ہراساں کرنے کے الزامات بے بنیاد ہیں۔ انہوں نے بنگلادیش کے انتخابات میں مداخلت کے الزامات بھی مسترد کردیے۔

ڈاکٹر محمد فیصل نے کہا کہ روسی وزیرخارجہ سرگئی لاروف نے افغان مفاہمتی عمل میں پاکستان کے کردار کو سراہا، وزارت تجارت کی شراکت سے وزارت خارجہ میں آج دو روزہ سفراء کانفرنس شروع ہو رہی ہے جس کا مقصد پاکستان میں سرمایہ کاری کو فروغ دینا ہے۔ کانفرنس میں وزیراعظم عمران خان، وزیر خزانہ اسد عمر، سرمایہ کاری حکام سمیت دیگر اہم عہدیدار شریک ہوں گے۔

ڈاکٹر محمد فیصل کا کہنا تھا کہ مقبوضہ کشمیر میں تازہ بھارتی جارحیت کے نتیجے میں 6 شہری شہید ہوئے اور رواں سال 500 سے زائد شہادتیں ہوئیں، ہمارا سب زور اسی بات پہ ہے کہ مسئلہ کا حل نکالا جائے، اقوام متحدہ اور عالمی برادری بھارتی افواج کے ظلم و ستم کا نوٹس لے، پانچ فروری کو پاکستان برطانیہ میں کشمیر کانفرنس اورریلی کا انعقاد کررہا ہے جس میں وزیر خارجہ شاہ محمود قریشی خصوصی شرکت کرینگے۔

ترجمان دفتر خارجہ نے کابل خود کش حملے کی مذمت کرتے ہوئے متاثرہ خاندانوں کے ساتھ افسوس کا اظہار کیا۔ ایک سوال کے جواب میں انہوں نے کہا کہ بھارتی سفارتی عملے کو اسلام آباد میں ہراساں کرنے کے الزامات بے بنیاد ہیں، پاکستان ویانا کنونشن کا احترام کرتا ہے، پاکستان میں بھارتی سفارت کار پوری آزادی سے کام کر رہے ہیں۔ ڈاکٹر فیصل نے بنگلادیش میں انتخابات میں مداخلت کے الزامات بھی مسترد کردیے۔

ڈاکٹر محمد فیصل نے بتایا کہ 341 پاکستانی قیدی بھارتی جیلوں میں قید ہیں، سزا پوری کرنے والے 45 قیدی ہیں جن میں 12 عام شہری اور 33 ماہی گیر ہیں جن کی واپسی کے لئے اقدامات اٹھا رہے ہیں، پاکستانی ہائی کمیشن نے بھارت میں قانونی ٹیم کی مدد حاصل کرنے کے لئے رابطہ کیا ہے۔