ٹینس اسٹار رافیل نڈال کا حسن سلوک سوشل میڈیا پر وائرل

اپنے پسندیدہ ٹینس اسٹار سے اتنے قریب سے ملنے پر بے حد خوش ہوں، انیتا۔ فوٹو : فائل

---

رافیل نٖڈال نے 13 سالہ لڑکی کے ساتھ شفقت بھرے سلوک سے مداحوں کے دل جیت لیے۔

اسپین سے تعلق رکھنے والے ٹینس کی دنیا کے نامور کھلاڑی رافیل نڈال کے ٹینس کورٹ میں کھڑی 13 سالہ لڑکی کے ساتھ شفقت بھرے سلوک نے نہ صرف ان کے مداحوں کا دل جیت لیا بلکہ سوشل میڈیا پر ان کے اس عمل کو کافی سراہا جارہا ہے۔

Rafael Nadal apologizes to courtside ball girl after he accidentally hits her in the face with an errant shot at the #AusOpen. (She appeared to be OK and got a kiss on the cheek from him.) pic.twitter.com/T2gtVuq2vJ

— Andrew Tavani (@andrewtavani) January 23, 2020

ہوا کچھ یوں کہ میلبورن میں جاری آسٹریلین اوپن کے دوران رافیل نڈال نے ریکٹ سے گیند ہٹ کی جو سائڈ میں کھڑی بال پکڑنے والی 13 سالہ بچی انیتا کو جالگی جس پر رافیل میچ چھوڑ کر فوراً بچی کے پاس پہنچ گئے اور اس کو پیار کیا۔



رافیل نڈال نے میچ کے بعد ایک انٹرویو میں کہا کہ جیسے ہی انیتا کو بال لگی میں ڈر گیا تھا، وہ لمحہ بہت برا تھا تاہم انیتا بہت بہادر لڑکی ہے۔



صرف یہی نہیں بلکہ میچ کے بعد رافیل نڈال نے انیتا اور اس کے اہل خانہ سے ملاقات کی، رافیل نڈال نے انیتا کو سائن کی ہوئی کیپ دی اور سیلفی لیکر سوشل میڈیا پر پوسٹ بھی کی جس میں ان کا کہنا تھا کہ مجھے خوشی ہے کہ انیتا بلکل ٹھیک ہے، جب کہ انیتا کے بھائی اور والدین کا بھی شکریہ ادا کرتا ہوں۔



13 سالہ انیتا کا کہنا تھا کہ اپنے پسندیدہ ٹینس اسٹار سے اتنے قریب سے ملنے پر بے حد خوش ہوں، مجھے یقین نہیں آرہا اور نہ ہی میں نے کبھی ایسا سوچا تھا۔