اسلام آباد کی شاہراہوں پر ٹریفک قوانین کی خلاف ورزی کے خلف اسلام آباد ٹریفک پولیس نے ڈرون ٹیکنالوجی کا استعمال کرنے کا فیصلہ کرلیا۔
رپورٹ کے مطابق وفاقی دارالحکومت میں ٹریفک قوانین کی خلاف ورزیاں روکنے کے لیے جدید ٹیکنالوجی استعمال کرنے کا فیصلہ کیا گیا، اسلام آباد ٹریفک پولیس ڈرون کیمروں کی مدد سے ٹریفک قوانین پر عمل درآمد یقینی بنائے گی۔
سی ٹی او اسلام آباد نے کہا کہ اسلام آباد کی مصروف شاہراہوں پر ڈرون کیمرے اڑائے جائیں گے، ڈرون کیمروں کی مدد سے خلاف ورزی کی نشاندہی اور فی الفور چالان ہوگا۔
چیف ٹریفک آفیسر نے کہا کہ ابتدائی طور پر ڈرون ٹیکنالوجی کا استعمال ایکسپریس وے اور سری نگر ہائی وے پر ہوگا۔
سید ذیشان حیدر نے کہا کہ اگلے مرحلے میں تمام سیکٹرز اور دیگر شاہراہوں پر بھی یہ ہی ٹیکنالوجی استعمال ہوگی، ڈرون کی مدد سے رش والے مقامات کی بھی نشاندہی کی جا سکے گی نشاندہی کے بعد خصوصی ٹیم فوری طور پر ریسپونس یقینی بنائے گی۔
سی ٹی او اسلام آباد نے کہا کہ جدید ٹیکنالوجی کی مدد سے ٹریفک قوانین کی پاسداری یقینی بنائی جا سکے گی۔
