یونس کی تنقیدی توپیں خاموش کرانے کی تیاری

وارننگ دینے کا امکان، لوگو تقریب میں مدعو نہ کیے جانے کا دعویٰ درست نہیں،بورڈ چیف فوٹو: فائل

---

یونس خان کی تنقیدی توپیں خاموش کرنے کیلیے وارننگ دیے جانے کا امکان ہے، چیئرمین پی سی بی شہریار خان کا کہنا ہے کہ یونس خان اپنی ون ڈے سلیکشن کے بارے میں بیانات مایوسی ظاہر کرتے ہیں، انھیں روکنے کیلیے ضرور کچھ نہ کچھ کرنا پڑے گا۔

تفصیلات کے مطابق یونس خان نے ون ڈے ٹیم میں شامل نہ کیے جانے پر ایک سے زیادہ بار پی سی بی اور سلیکشن کمیٹی پر تنقید کی ہے، اس کے علاوہ پاکستان سپر لیگ کی تقریب میں بھی مدعو نہ کیے جانے پر بھی سخت مایوسی کا اظہار کیا تھا، منگل کو پریس کانفرنس میں شہریار خان سے سوال کیا گیا کہ آخر کیا وجہ ہے کہ پی سی بی یونس خان کی جانب سے مسلسل بیانات دیے جانے کے باوجود ڈسپلن کی خلاف ورزی پر کوئی کارروائی کرتا؟ جواب میں انھوں نے کہا کہ سابق کپتان کی مایوسی ہے، وہ بڑے کرکٹر اور اچھے آدمی ہیں۔

انھیں بٹھا کر سمجھایا جائیگا، جہاں تک ایکشن کی بات ہے تو وہ سوچا جائے گا کیونکہ ایکشن دو طرح کے ہوتے ہیں ایک بہت سخت اور دوسرا معتدل، ان دونوں کے درمیان بورڈ کو کوئی پوزیشن لینی ہوگی لیکن ضرور کچھ نہ کچھ کرنا پڑے گا، ممکن ہے کہ یونس خان کو وارننگ دی جائے، شہریار خان نے یونس خان کے اس دعوے کو مسترد کر دیا کہ پاکستان سپر لیگ کی تقریب میں انھیں مدعو نہیں کیا گیا تھا۔

انھوں نے کہا کہ اگر دعوت نہ دی گئی ہوتی تو اس غلطی کی معافی خود مانگتا، یونس خان کو بلایا گیا تھا لیکن انھوں نے آنے جانے کا خرچہ طلب کیا تھا، شہریار خان نے اس تاثر کو بھی غلط قرار دیا کہ پی سی بی نے تجربہ کار بیٹسمین سے کہا ہے کہ اگر وہ ون ڈے انٹرنیشنل سے ریٹائرمنٹ کا اعلان کرنے کیلیے تیار ہیں تو انھیں محدود اوورز کی کرکٹ کیلیے قومی ٹیم میں شامل کیا جا سکتا ہے، انھوں نے کہا کہ جب تک وہ کرکٹ بورڈ کے چیئرمین ہیں کسی بھی کھلاڑی کو ریٹائرمنٹ پر مجبور نہیں کیا جائے گا۔