80 سالہ شخص نے خاتون کو قتل کرکے خودکشی کرلی

فائرنگ کے واقعے میں زخمی شخص کی حالت نازک بتائی جا رہی ہے

ویب ڈیسک May 04, 2018

امریکا میں فائرنگ کے واقعات میں تیزی سے اضافہ ہوا ہے۔ فوٹو : فائل

مل ویلی کے ایک رہائشی اپارٹمنٹ میں 80 سالہ شخص نے فائرنگ کرکے ایک خاتون کو ہلاک اور ایک شخص کو زخمی کرنے کے بعد خودکشی کر لی۔

بین الاقوامی خبر رساں ادارے کے مطابق کیلیفورنیا اپارٹمنٹ کمپلیکس میں 80 سالہ شخص نے ایک خاتون پر فائرنگ کردی جس کے نتیجے میں خاتون موقع پر ہی ہلاک ہو گئیں جب کے خاتون کے ہمراہ موجود شخص زخمی ہوگیا جسے قریبی اسپتال کے انتہائی نگہداشت کے وارڈ میں طبی امداد دی جا رہی ہے۔ حملہ آور نے بعد ازاں اسی پستول سے خود کشی کرلی۔

پولیس حکام کا کہنا ہے کہ فائرنگ کا واقعہ رہائشی علاقے میں پیش آیا۔ پولیس نے اپارٹمنٹ کا محاصرہ کرلیا اور گھر گھر تلاشی کے دوران اپارٹمنٹ کی بالائی منزل سے حملہ آور شخص کی لاش بر آمد کرلی جب کہ لاش کے قریب ہی آلہ قتل بھی موجود تھا۔ تاحال واقعے کی وجہ کا تعین نہیں کیا جاسکا ہے۔ تفتیش کا عمل جاری ہے اور پولیس کا کہنا ہے کہ وہ جلد قتل کے محرکات تک پہنچ جائے گی۔

واضح رہے کہ امریکا میں فائرنگ کے واقعات میں تیزی سے اضافہ دیکھنے میں آیا ہے جس کی وجہ سے ٹرمپ انتظامیہ کو اسلحہ کے لائسنس کے اجراء کے حوالے سے قوانین کو سخت کرنے کےلیے بھی عوامی دباؤ کا سامنا ہے۔